മടക്കയാത്രയ്ക്ക് മണിക്കൂറുകൾ മാത്രം; പ്രവാസി വ്യവസായിയെയും ഭാര്യയെയും നാട്ടിൽ മരിച്ച നിലയിൽ കണ്ടെത്തി

റാസൽഖൈമ : നാൽപത് വർഷത്തിലേറെയായി യുഎഇയിലെ റാസൽഖൈമയിൽ ബിസിനസ് നടത്തുന്ന മലയാളി വ്യവസായിയെയും ഭാര്യയെയും കേരളത്തിലെ വീട്ടിനുള്ളിൽ മരിച്ച നിലയിൽ കണ്ടെത്തി. കൊല്ലം കടയ്ക്കൽ അഞ്ചുമുക്ക് സ്വദേശികളായ ദമ്പതികളെയാണ് യുഎഇയിലേക്കുള്ള മടക്കയാത്രയ്ക്ക് മണിക്കൂറുകൾ മാത്രം ബാക്കിനിൽക്കെ കിടപ്പുമുറിയിൽ മരിച്ച നിലയിൽ കണ്ടെത്തിയത്. ദമ്പതികളുടെ മക്കൾ നിലവിൽ യുഎഇയിലാണുള്ളത്. റാസൽഖൈമയിൽ കൺസ്ട്രക്ഷൻ കമ്പനി ഉൾപ്പെടെയുള്ള ബിസിനസുകൾ നടത്തിവരികയായിരുന്ന കുടുംബം നാട്ടിലും യുഎഇയിലുമായി മാറിമാറിയായിരുന്നു താമസം. ഹ്രസ്വമായ നാട്ടിലെ സന്ദർശനത്തിന് ശേഷം ശനിയാഴ്ച വൈകുന്നേരത്തെ വിമാനത്തിൽ ഇരുവരും റാസൽഖൈമയിലേക്ക് മടങ്ങാനിരിക്കുകയായിരുന്നു. സംഭവത്തിൽ ദുരൂഹതയുള്ളതിനാൽ പോലീസ് അന്വേഷണം ആരംഭിച്ചിട്ടുണ്ട്.