യുഎഇയിൽ മഴ സാധ്യതയും കടുത്ത ചൂടും

അബുദാബി : യുഎഇയിൽ വെള്ളിയാഴ്ച തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥയായിരിക്കുമെന്ന് ദേശീയ കാലാവസ്ഥാ കേന്ദ്രം അറിയിച്ചു. ഉച്ചകഴിഞ്ഞ് രാജ്യത്തിന്റെ കിഴക്കൻ, തെക്കൻ മേഖലകളിൽ മഴയ്ക്ക് സാധ്യതയുള്ള പ്രാദേശിക മഴമേഘങ്ങൾ രൂപപ്പെട്ടേക്കാം. രാത്രിയിലും ശനിയാഴ്ച രാവിലെയുമായി തീരദേശ, ഉൾനാടൻ പ്രദേശങ്ങളിൽ അന്തരീക്ഷ ഈർപ്പം ഉയർന്ന നിലയിലായിരിക്കും; ഇതോടൊപ്പം മഞ്ഞിനുള്ള സാധ്യതയുമുണ്ട്. അബുദാബിയിലും ദുബായിലും ഈർപ്പത്തിന്റെ അളവ് 25 മുതൽ 85 ശതമാനം വരെ ഉയർന്നേക്കാം. രാജ്യത്ത് പൊതുവെ ഉയർന്ന താപനില 45 ഡിഗ്രി സെൽഷ്യസ് വരെ എത്തുമ്പോൾ അബുദാബിയിൽ 42 ഡിഗ്രി സെൽഷ്യസും ദുബായിൽ 41 ഡിഗ്രി സെൽഷ്യസും രേഖപ്പെടുത്താൻ സാധ്യതയുണ്ട്. രാത്രിയിൽ അബുദാബി, ദുബായ് നഗരങ്ങളിൽ താപനില 32 ഡിഗ്രി സെൽഷ്യസിലേക്കും ഉൾനാടുകളിൽ 26 ഡിഗ്രി സെൽഷ്യസിലേക്കും താഴും. തെക്കുകിഴക്കൻ ദിശയിൽ നിന്ന് വടക്കുപടിഞ്ഞാറൻ ദിശയിലേക്ക് മണിക്കൂറിൽ 10 മുതൽ 25 കിലോമീറ്റർ വരെ വേഗതയിൽ വീശുന്ന കാറ്റ്, ചില സമയങ്ങളിൽ 45 കിലോമീറ്റർ വരെ ശക്തി പ്രാപിച്ച് പൊടിപടലങ്ങൾ ഉയരാൻ കാരണമാകും. അറേബ്യൻ ഉൾക്കടലിലും ഒമാൻ കടലിലും കടൽ ശാന്തമായിരിക്കും.