ദുബായ്: പ്രമുഖ സാമ്പത്തിക വിദ്യാഭ്യാസ സ്ഥാപനമായ മിഥുൻസ് മണി മാർക്കറ്റ് (MMM) തങ്ങളുടെ അഞ്ചാമത് ബ്രാഞ്ച് ദുബായ് ഖിസൈസ് ഇൻഡസ്ട്രിയൽ ഏരിയ 1-ലെ ബിൻ ഷബീബ് മാളിൽ പ്രവർത്തനമാരംഭിച്ചു. സാമ്പത്തിക വളർച്ച കൈവരിക്കാൻ പ്രാപ്തരാക്കുക എന്ന ലക്ഷ്യത്തിലേക്കുള്ള സുപ്രധാന നാഴികക്കല്ലാണിത്. റിട്ട. മേജർ ഒമർ അൽമർസൂഖി മുഖ്യാതിഥിയായ ചടങ്ങിൽ, ദുബായ് എസ് പി ജെയിൻ സ്കൂൾ ഓഫ് ഗ്ലോബൽ മാനേജ്മെന്റിലെ ഡീനും സ്ട്രാറ്റജി പ്രൊഫസറുമായ ഡോ. ഗാരി സ്റ്റോക്ക്പോർട്ട് വിശിഷ്ടാതിഥിയായി പങ്കെടുത്തു. മിഥുൻസ് മണി മാർക്കറ്റ് സ്ഥാപകനും സിഇഒയുമായ മിഥുൻ ഗിരീഷൻ, ട്രേഡ്247 സിഇഒ അരുൺ ഷിയോറാൻ, ദുബായ് ഇസ്ലാമിക് ബാങ്ക് ട്രഷറി വൈസ് പ്രസിഡന്റ് ഐസക് ആന്റണി എന്നിവരും ചടങ്ങിൽ സന്നിഹിതരായിരുന്നു.
സാമ്പത്തിക ബുദ്ധിമുട്ടുകൾ കാരണം ഒരു വിദ്യാർത്ഥിയുടെയും പഠനം മുടങ്ങരുത് എന്ന സ്ഥാപകൻ മിഥുൻ ഗിരീഷന്റെ കാഴ്ചപ്പാടിൽ നിന്നാണ് ഈ സ്കോളർഷിപ്പ് പദ്ധതി രൂപീകരിച്ചിരിക്കുന്നത്. ലഭിച്ച നൂറോളം അപേക്ഷകളിൽ നിന്ന് സ്വതന്ത്ര ജൂറി പാനൽ അക്കാദമിക് മികവും സാമ്പത്തിക പശ്ചാത്തലവും വിലയിരുത്തി തിരഞ്ഞെടുത്ത 10 മിടുക്കരായ വിദ്യാർത്ഥികൾക്ക് ഒരു ലക്ഷം രൂപ വീതമാണ് സ്കോളർഷിപ്പ് സമ്മാനിച്ചത്.
ഉയർന്ന നിലവാരമുള്ള സാമ്പത്തിക വിദ്യാഭ്യാസവും ട്രേഡിംഗ് സേവനങ്ങളും ഉപഭോക്താക്കൾക്ക് കൂടുതൽ എളുപ്പത്തിൽ ലഭ്യമാക്കുകയാണ് പുതിയ ബ്രാഞ്ചിലൂടെ ലക്ഷ്യമിടുന്നതെന്ന് മിഥുൻ ഗിരീഷൻ വ്യക്തമാക്കി. അടിസ്ഥാന സാമ്പത്തിക സാക്ഷരത ഓരോരുത്തരുടെയും അവകാശമാണെന്ന ബോധ്യത്തിൽ, ഖിസൈസ് ബ്രാഞ്ചിൽ പൊതുജനങ്ങൾക്കായി എംഎംഎം അക്കാദമിയുടെ സൌജന്യ വരാന്ത്യ സാമ്പത്തിക സാക്ഷരത-ട്രേഡിംഗ് വർക്ക്‌ഷോപ്പുകളും സംഘടിപ്പിക്കും. പുതിയ ഇൻഫ്രാസ്ട്രക്ചർ സൗകര്യങ്ങളോടെ ആരംഭിച്ച ഈ ബ്രാഞ്ച് എല്ലാ തലങ്ങളിലുമുള്ള നിക്ഷേപകർക്കും ട്രേഡർമാർക്കും മികച്ച പരിശീലനവും കൺസൾട്ടേഷൻ അനുഭവവും നൽകും. യുഎഇയിലുടനീളം തങ്ങളുടെ സാന്നിധ്യം ശക്തമാക്കുന്നതിനൊപ്പം സുതാര്യതയും കമ്മ്യൂണിറ്റി ശാക്തീകരണവും ഉറപ്പാക്കാൻ മിഥുൻസ് മണി മാർക്കറ്റ് പ്രതിജ്ഞാബദ്ധമാണെന്നും അധികൃതർ അറിയിച്ചു.