ദുബായ് : ലോക കടലാമ ദിനത്തോട് (World Sea Turtle Day) അനുബന്ധിച്ച് ദുബായ് തീരത്തുനിന്ന് 23 കടലാമകളെ സമുദ്രത്തിലേക്ക് തിരികെവിട്ടു. ദുബായ് എൻവയോൺമെന്റ് ആൻഡ് ക്ലൈമറ്റ് ചേഞ്ച് അതോറിറ്റിയുമായി സഹകരിച്ച് ജുമൈറ ഗ്രൂപ്പ് നടത്തുന്ന ‘ദുബായ് ടർട്ടിൽ റീഹാബിലിറ്റേഷൻ പ്രോജക്റ്റിന്റെ’ (DTRP) ഭാഗമായാണ് ഇവയെ സംരക്ഷിച്ച ശേഷം സുരക്ഷിതമായി കടലിലേക്ക് ഒഴുക്കിയത്. 22 ഗ്രീൻ ടർട്ടിലുകളും ഒരു ഹോക്സ്ബിൽ ടർട്ടിലുമാണ് ഈ സംഘത്തിലുണ്ടായിരുന്നത്.
ഇതിൽ ഒരു മുൻതുഴ കൈ നഷ്ടപ്പെട്ട ‘ഫോക്സി’ (Foxy) എന്ന കടലാമയാണ് പ്രധാന ആകർഷണം. കഴിഞ്ഞ വർഷം റാസൽഖൈമ തീരത്തുനിന്ന് പരിക്കേറ്റ നിലയിൽ കണ്ടെത്തിയ ഫോക്സിയെ ശസ്ത്രക്രിയയിലൂടെയും വിദഗ്ധ പരിചരണത്തിലൂടെയുമാണ് ജീവിതത്തിലേക്ക് തിരികെ കൊണ്ടുവന്നത്. ഉപഗ്രഹ ട്രാക്കർ ഘടിപ്പിച്ച് കടലിലേക്ക് വിടുന്ന നൂറാമത്തെ കടലാമയെന്ന പ്രത്യേകതയും ഫോക്സിക്കുണ്ട്. അബുദാബി തീരത്തുനിന്ന് രക്ഷപെടുത്തിയ ‘ഫാത്തിമ’ എന്ന വലിയ പെൺ കടലാമയ്ക്കും ട്രാക്കർ ഘടിപ്പിച്ചിട്ടുണ്ട്. 2004-ൽ ആരംഭിച്ച ഈ പദ്ധതിയിലൂടെ ഇതുവരെ 2,351 കടലാമകളെയാണ് ദുബായ് സംഘം പുനരധിവസിപ്പിച്ച് കടലിലേക്ക് തിരിച്ചുവിട്ടത്. പരിക്കേറ്റ കടലാമകളെ കണ്ടെത്തുകയാണെങ്കിൽ വിവരമറിയിക്കാൻ ‘800-TURTLE’ എന്ന ഹെൽപ്‌ലൈൻ നമ്പറും യുഎഇയിൽ സജ്ജമാക്കിയിട്ടുണ്ട്.