ദുബൈ: ഇറാൻ-യുഎസ് പ്രാദേശിക സംഘർഷങ്ങളെ തുടർന്ന് കുവൈത്ത് അന്താരാഷ്ട്ര വിമാനത്താവളത്തിന്റെ പ്രവർത്തനങ്ങളിൽ തടസ്സം നേരിട്ടതോടെ, യുഎഇയിൽ നിന്നും കുവൈത്തിലേക്കുള്ള വിമാന സർവീസുകൾ അനിശ്ചിതത്വത്തിലായി. നിരവധി സർവീസുകളാണ് വിവിധ എയർലൈനുകൾ ഇതിനോടകം റദ്ദാക്കിയത്.
മേഖലയിലെ നിലവിലെ സാഹചര്യങ്ങൾ കണക്കിലെടുത്ത് ജൂലൈ 19 വരെയുള്ള നിരവധി ദുബൈ-കുവൈത്ത് സർവീസുകൾ എമിറേറ്റ്സ് എയർലൈൻസ് പൂർണ്ണമായും റദ്ദാക്കിയിട്ടുണ്ട്. ഇത്തിഹാദ് എയർവേസിന്റെ അബുദാബി-കുവൈത്ത് ഫ്ലൈറ്റ് (EY653) നിലവിൽ കൂടുതൽ വിവരങ്ങൾക്കായി കാത്തിരിക്കുകയാണ് (awaiting update) എന്ന വിഭാഗത്തിലാണ് ഉൾപ്പെടുത്തിയിരിക്കുന്നത്. കൂടാതെ എയർ അറേബ്യയും യുഎഇക്കും കുവൈത്തിനും ഇടയിലുള്ള തങ്ങളുടെ നിരവധി സർവീസുകൾ റദ്ദാക്കിയതായി അവരുടെ ഫ്ലൈറ്റ് സ്റ്റാറ്റസ് പേജിലൂടെ വ്യക്തമാക്കി. യാത്രാതടസ്സങ്ങൾ ഒഴിവാക്കാൻ വിമാനത്താവളത്തിലേക്ക് പുറപ്പെടുന്നതിന് മുൻപ് യാത്രക്കാർ തങ്ങളുടെ എയർലൈനുകളുമായി ബന്ധപ്പെട്ട് കൃത്യമായ വിവരങ്ങൾ ഉറപ്പുവരുത്തണമെന്ന് അധികൃതർ നിർദ്ദേശിച്ചു.