ട്രെയിലർ ഡ്രൈവർമാരുടെ ശ്രദ്ധയ്ക്ക്! കൂടുതൽ സുരക്ഷാ വീഴ്ചകൾ കണ്ടെത്തി ആർടിഎ

ദുബായ് : ദുബായിലെ റോഡുകളിൽ ആർടിഎ (RTA) നടത്തിയ പ്രത്യേക സുരക്ഷാ പരിശോധനയിൽ വൻതോതിൽ സുരക്ഷാ വീഴ്ചകൾ കണ്ടെത്തി. ഈ വർഷത്തിന്റെ ആദ്യ പകുതിയിൽ ‘ട്രെയിലർ സേഫ്റ്റി’ എന്ന പേരിൽ നടത്തിയ കാമ്പയിനിലാണ് 1,500 ഓളം ഹെവി വാഹനങ്ങൾ പരിശോധിച്ചത്.
തേഞ്ഞുതീർന്ന ടയറുകൾ ഉപയോഗിക്കുക, പിൻവശത്തെയും വശങ്ങളിലെയും ലൈറ്റുകൾ പ്രവർത്തിക്കാതിരിക്കുക, നിർബന്ധമായും പതിക്കേണ്ട റിഫ്ലക്റ്റീവ് സ്റ്റിക്കറുകൾ ഇല്ലാതിരിക്കുക, അപകടകരമായ രീതിയിൽ സാധനങ്ങൾ കയറ്റുക എന്നിവയാണ് പ്രധാനമായും കണ്ടെത്തിയ നിയമലംഘനങ്ങൾ. ഹെവി വാഹനങ്ങൾ മൂലമുണ്ടാകുന്ന അപകടങ്ങൾ കുറയ്ക്കുന്നതിനും റോഡ് സുരക്ഷ ഉറപ്പാക്കുന്നതിനുമായാണ് ആർടിഎ പരിശോധന കർശനമാക്കിയത്. ട്രെയിലറുകളുടെ ലൈസൻസും രജിസ്ട്രേഷനും കൃത്യമായി പുതുക്കണമെന്നും ഡ്രൈവർമാർക്ക് സാധുതയുള്ള പ്രൊഫഷണൽ പെർമിറ്റ് ഉണ്ടായിരിക്കണമെന്നും അധികൃതർ ഓർമ്മിപ്പിച്ചു. ഡ്രൈവർമാർക്ക് സുരക്ഷാ നിർദ്ദേശങ്ങൾ എളുപ്പത്തിൽ മനസ്സിലാക്കാൻ അറബിക്, ഇംഗ്ലീഷ്, ഉറുദു ഭാഷകളിലുള്ള ക്യുആർ കോഡുകളും ആർടിഎ വിതരണം ചെയ്തു.