എത്തിഹാദ് റെയിൽ നിർമ്മാണം അവസാന ഘട്ടത്തിൽ; അബുദാബി യാത്ര ഇനി മിനിറ്റുകൾക്കുള്ളിൽ

ദുബായ് : യുഎഇയുടെ ദേശീയ റെയിൽ ശൃംഖലയായ എത്തിഹാദ് റെയിലിന്റെ ദുബായ് സ്റ്റേഷൻ (അൽ യലായീസ്) സെപ്റ്റംബർ 30-ന് പ്രവർത്തനം ആരംഭിക്കാനിരിക്കെ വൻ ആവേശത്തിലാണ് പ്രദേശവാസികൾ. അൽ ഫുർജാൻ, ജുമൈറ ഗോൾഫ് എസ്റ്റേറ്റ്സ് (JGE) എന്നീ മേഖലകളിലുള്ളവർ മാസങ്ങളായി ട്രെയിനിന്റെ പരീക്ഷണ ഓട്ടങ്ങൾ വീക്ഷിച്ചാണ് കാത്തിരിക്കുന്നത്. അബുദാബിയിലേക്കുള്ള യാത്രാസമയം പകുതിയായി കുറയുന്നതും ദുബായ് മെട്രോയുമായി ബന്ധിപ്പിക്കുന്ന പുതിയ മേൽപ്പാലം പൂർത്തിയാകുന്നതും കുടുംബങ്ങൾക്കും പ്രതിദിന യാത്രക്കാർക്കും വലിയ അനുഗ്രഹമാകും.
ഈ സൗകര്യങ്ങൾ പ്രദേശത്തെ റിയൽ എസ്റ്റേറ്റ് മേഖലയിലും വലിയ കുതിച്ചുചാട്ടമുണ്ടാക്കിയിട്ടുണ്ട്. എട്ട് വർഷം മുൻപത്തെ അപേക്ഷിച്ച് വില്ലകളുടെയും വസ്തുക്കളുടെയും മൂല്യം മൂന്നിരട്ടിയോളം വർദ്ധിക്കുകയും വാടക നിരക്കുകൾ ഉയരുകയും ചെയ്തിട്ടുണ്ട്. മേഖലയിൽ സർവീസ്ഡ് അപ്പാർട്ട്മെന്റുകളുടെയും എയർ ബിഎൻബികളുടെയും എണ്ണത്തിൽ വലിയ വർദ്ധനവാണ് രേഖപ്പെടുത്തുന്നത്. വാഹനം പെരുകുന്നതിലൂടെ ഗതാഗതക്കുരുക്ക് ഉണ്ടായേക്കാമെന്ന ചില ആശങ്കകൾക്കിടയിലും, അബുദാബി, ഷാർജ, ഫുജൈറ തുടങ്ങിയ ഇടങ്ങളിലേക്കുള്ള യാത്രാസൗകര്യം മെച്ചപ്പെടുന്നത് ജനങ്ങളിൽ വലിയ പ്രതീക്ഷ നൽകുന്നു.