ദുബായ്, റിയാദ് വിമാന സർവീസുകൾ താൽക്കാലികമായി നിർത്തിവെച്ച് എയർ ഫ്രാൻസ്

ദുബായ് : മേഖലയിലെ നിലവിലെ സുരക്ഷാ സാഹചര്യങ്ങൾ വിലയിരുത്തി ദുബായ്, റിയാദ് എയർപോർട്ടുകളിലേക്കുള്ള വിമാന സർവീസുകൾ താൽക്കാലികമായി നിർത്തിവെച്ചതായി എയർ ഫ്രാൻസ് (Air France) അറിയിച്ചു. പശ്ചിമേഷ്യൻ മേഖലയിൽ സംഘർഷം രൂക്ഷമായ പശ്ചാത്തലത്തിൽ യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിന്റെ ഭാഗമായാണ് നടപടി. ഒക്ടോബർ 13 വരെ ദുബായിലേക്കും സെപ്റ്റംബർ 28 വരെ റിയാദിലേക്കുമുള്ള സർവീസുകളാണ് എയർ ഫ്രാൻസ് നിർത്തിവെച്ചിരിക്കുന്നത്.
അതേസമയം സെപ്റ്റംബർ 26 മുതൽ ബെയ്‌റൂട്ടിലേക്കുള്ള വിമാന സർവീസുകൾ പുനരാരംഭിക്കുമെന്നും ടെൽ അവീവിലേക്കുള്ള വിമാനങ്ങൾ നിലവിൽ തടസ്സമില്ലാതെ സർവീസ് നടത്തുന്നുണ്ടെന്നും എയർലൈൻ പ്രസ്താവനയിലൂടെ വ്യക്തമാക്കി. സർവീസ് റദ്ദാക്കൽ ബാധിച്ച യാത്രക്കാരുമായി വ്യക്തിഗതമായി ബന്ധപ്പെട്ട് വരികയാണെന്നും അധികൃതർ അറിയിച്ചു. ചെങ്കടൽ മേഖലയിലും അറബിക്കടലിലും നിലനിൽക്കുന്ന സംഘർഷാവസ്ഥ വിമാന സർവീസുകളെയും വ്യോമപാതകളെയും കാര്യമായി ബാധിച്ചിട്ടുണ്ട്.