അബുദാബി : വയറ്റിലെ ആന്തരിക രക്തസ്രാവം മിനിറ്റുകൾക്കകം കണ്ടെത്താൻ സഹായിക്കുന്ന അത്യാധുനിക ‘വിഴുങ്ങാവുന്ന ക്യാപ്സൂൾ’ (PillSense) വിജയകരമായി പരീക്ഷിച്ച് അബുദാബിയിലെ ശൈഖ് ശഖ്ബൂത് മെഡിക്കൽ സിറ്റി (SSMC). ദഹനവ്യവസ്ഥയുടെ മുകൾഭാഗത്തുണ്ടാകുന്ന രക്തസ്രാവം തിരിച്ചറിയാൻ സാധാരണയായി മണിക്കൂറുകൾ നീളുന്ന എൻഡോസ്കോപ്പി പരിശോധനകൾക്ക് പകരം വെറും 10 മിനിറ്റിൽ താഴെ സമയം കൊണ്ട് കൃത്യമായ ഫലം നൽകാൻ ഈ ഉപകരണത്തിന് സാധിക്കും. അയർലൻഡ് ആസ്ഥാനമായുള്ള എന്ററാസെൻസ് (EnteraSense) എന്ന കമ്പനി വികസിപ്പിച്ച ഈ ക്യാപ്സൂളിന് യുഎസ് എഫ്ഡിഎയുടെ (FDA) അംഗീകാരമുണ്ട്.
രക്തം ഛർദ്ദിക്കുക, കറുത്ത നിറത്തിൽ മലം പോവുക, രക്തസമ്മർദ്ദം കുറഞ്ഞ് തലകറക്കം അനുഭവപ്പെടുക തുടങ്ങിയ ലക്ഷണങ്ങളുമായി എമർജൻസി വിഭാഗത്തിൽ എത്തുന്ന രോഗികളിലാണ് ഈ ക്യാപ്സൂൾ നിലവിൽ ഉപയോഗിക്കുന്നത്. രോഗി വിഴുങ്ങുന്ന ഈ ചെറിയ ക്യാപ്സൂൾ വയറ്റിലെത്തി പ്രകാശ തരംഗങ്ങൾ (Light absorption technology) ഉപയോഗിച്ച് രക്തത്തിന്റെ സാന്നിധ്യം കണ്ടെത്തുകയും വയർലെസ് സംവിധാനത്തിലൂടെ പുറത്തുള്ള റിസീവറിലേക്ക് വിവരങ്ങൾ കൈമാറുകയും ചെയ്യും. എസ്എസ്എംസിയിൽ നടത്തിയ പ്രാഥമിക പരിശോധനകളിൽ 86 ശതമാനം രോഗികൾക്കും അടിയന്തര എൻഡോസ്കോപ്പി പോലുള്ള സങ്കീർണ്ണമായ പ്രക്രിയകൾ ഒഴിവാക്കാൻ ഇത് സഹായിച്ചതായി ഗ്യാസ്ട്രോഎൻട്രോളജി കൺസൾട്ടന്റ് ഡോ. മുസ്തഫ അഹമ്മദ് ഷെഹാത്ത പറഞ്ഞു. രോഗികൾക്ക് വലിയ ആശ്വാസം നൽകുന്ന ഈ പുതിയ സാങ്കേതികവിദ്യ വരും ദിവസങ്ങളിൽ അബുദാബിയിലുടനീളമുള്ള ആശുപത്രികളിലേക്ക് വ്യാപിപ്പിക്കാനാണ് അധികൃതരുടെ തീരുമാനം.