അബുദാബി : ഗുവൈഫാത്ത് ബോർഡർ ക്രോസിംഗിലേക്ക് യാത്ര ചെയ്യുന്നതിനിടെ ബസ് കേടായി വഴിയാധാരമായ കുടുംബങ്ങൾക്ക് അടിയന്തര സഹായം എത്തിച്ചുനൽകിയ അബുദാബി പോലീസ് ഉദ്യോഗസ്ഥന് ആദരം. ഫസ്റ്റ് പോലീസ്‌മാൻ അലി അബ്ദുൽഹാദി അൽ ഹാജരിയെയാണ് അബുദാബി പോലീസ് കമാൻഡർ ഇൻ ചീഫ് മേജർ ജനറൽ അഹമ്മദ് സെയ്ഫ് ബിൻ സൈതൂൻ അൽ മുഹൈരി നേരിട്ട് ആദരിച്ചത്. സെൻട്രൽ ഓപ്പറേഷൻസ് സെക്ടർ ഡയറക്ടർ ബ്രിഗേഡിയർ നാസർ സുലൈമാൻ അൽ മസ്കരിയുടെ സാന്നിധ്യത്തിലായിരുന്നു ചടങ്ങ്.
യാത്രയ്ക്കിടെ വാഹനം കേടായതിനെ തുടർന്ന് ബുദ്ധിമുട്ടിലായ കുടുംബങ്ങളുടെ ക്ഷേമമന്വേഷിക്കുകയും അവർക്ക് ആവശ്യമായ സഹായങ്ങളും സേവനങ്ങളും സമയബന്ധിതമായി എത്തിച്ചു നൽകുകയും ചെയ്തതിനാണ് ആദരം. പോലീസിന്റെ ചുമതലകൾക്കപ്പുറം സഹജീവികളോട് മാനുഷിക പരിഗണന കാണിക്കുകയും സഹായിക്കുകയും ചെയ്യുന്നത് യുഎഇ സമൂഹത്തിന്റെ മൂല്യങ്ങളെയാണ് ഉയർത്തിക്കാട്ടുന്നതെന്ന് മേജർ ജനറൽ അൽ മുഹൈരി അഭിപ്രായപ്പെട്ടു. പൊതുജനങ്ങളെ സഹായിക്കുക എന്നത് ദേശീയവും മാനുഷികവുമായ കടമയാണെന്ന് അൽ ഹാജരി പ്രതികരിച്ചു.
50