ഒരു പുസ്തകവും വർഷങ്ങളുടെ ഓർമ്മകളും: ഷെയ്ഖ് മുഹമ്മദിന് അൻവർ ഗർഗാഷിന്റെ ആദരം

ദുബായ് : യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തുമിന്റെ ‘ദി ലെറ്റേഴ്സ്’ (The Letters) എന്ന പുതിയ പുസ്തകം സമ്മാനമായി ലഭിച്ചതിൽ സന്തോഷവും ആദരവും പങ്കുവെച്ച് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ്. വർഷങ്ങളോളം അദ്ദേഹത്തോടൊപ്പം പ്രവർത്തിക്കാൻ സാധിച്ചത് വ്യക്തിപരമായി വലിയ ഭാഗ്യമാണെന്നും പുസ്തകം കൈപ്പറ്റിയതിന് ശേഷം സോഷ്യൽ മീഡിയ പ്ലാറ്റ്‌ഫോമായ ‘എക്‌സിൽ’ (X) കുറിച്ച കുറിപ്പിൽ അദ്ദേഹം വ്യക്തമാക്കി.
വായിക്കാൻ ഏറേ ഇഷ്ടപ്പെടുന്ന വ്യക്തിയെന്ന നിലയിൽ ഈ പുസ്തകം തനിക്ക് ഏറെ പ്രിയപ്പെട്ടതാണെന്നും എന്നാൽ ഇതിന്റെ രചയിതാവാണ് ഈ സമ്മാനത്തിന് കൂടുതൽ മൂല്യം നൽകുന്നതെന്നും ഗർഗാഷ് പറഞ്ഞു. ഷെയ്ഖ് മുഹമ്മദ് ഒരു മഹാനായ നേതാവും അധ്യാപകനുമാണ്. അദ്ദേഹത്തിന്റെ ദീർഘവീക്ഷണം, ശുഭാപ്തിവിശ്വാസം, കർമ്മശേഷി എന്നിവയിൽ നിന്നും ഒരുപാട് കാര്യങ്ങൾ പഠിക്കാൻ സാധിച്ചിട്ടുണ്ടെന്നും അതിലൂടെ ലഭിച്ച അനുഭവങ്ങൾ എന്നും വിലമതിക്കുന്ന ഓർമ്മകളായി സൂക്ഷിക്കുമെന്നും അദ്ദേഹം കൂട്ടിച്ചേർത്തു.