യുഎഇയിലെ സാഹസിക ടൂറിസത്തിൽ ചരിത്രമെഴുതാൻ ‘ജെബൽ ജൈസ് ഗ്രാൻഡ് ലൂപ്പ്

റസൽഖൈമ : യുഎഇയിലെ ഏറ്റവും ഉയർന്ന കൊടുമുടിയായ ജെബൽ ജൈസിൽ (Jebel Jais) സാഹസിക സഞ്ചാരികളെയും ട്രെക്കിംഗ് പ്രേമികളെയും ആകർഷിക്കുന്നതിനായി വൻ വികസന പദ്ധതികൾ പ്രഖ്യാപിച്ച് റസൽഖൈമ. 80 കിലോമീറ്റർ നീളമുള്ള ‘ഗ്രാൻഡ് ലൂപ്പ്’ (Grand Loop) എന്ന കൂറ്റൻ ട്രെക്കിംഗ് പാതയും 5 ദിവസം നീളുന്ന ക്ലൈംബിംഗ് റൂട്ടും ഉൾപ്പെടുന്ന പദ്ധതിയുടെ നിർമ്മാണ പ്രവർത്തനങ്ങൾ പുരോഗമിക്കുകയാണ്. റസൽഖൈമയിലെ മുൻനിര ഡെവലപ്പർമാരായ ‘മർജാൻ’ (Marjan) ആണ് ഈ ബൃഹത്തായ പദ്ധതിക്ക് പിന്നിൽ പ്രവർത്തിക്കുന്നത്.
ഹൈക്കിംഗ്, ക്ലൈംബിംഗ്, ക്യാമ്പിംഗ്, സൈക്ലിംഗ് എന്നിവയെല്ലാം സംയോജിപ്പിച്ചാണ് 80 കിലോമീറ്ററിന്റെ ഗ്രാൻഡ് ലൂപ്പ് പാത സജ്ജീകരിക്കുന്നത്. കൂടാതെ വടക്കൻ റസൽഖൈമയിലെ പാറക്കെട്ടുകളിലൂടെ 20 കിലോമീറ്റർ ദൂരത്തിൽ 5 ദിവസം കൊണ്ട് പൂർത്തിയാക്കാവുന്ന പുതിയ Via Ferrata റൂട്ടും മലമുകളിൽ തങ്ങാനുള്ള ഷെൽട്ടറുകളും നിർമ്മിക്കുന്നുണ്ട്. പരിസ്ഥിതി സംരക്ഷണത്തിനും സുരക്ഷയ്ക്കും മുൻഗണന നൽകി നടപ്പിലാക്കുന്ന പദ്ധതി പ്രദേശത്ത് അപൂർവ്വ ഇനം ജീവജാലങ്ങളുടെയും സസ്യങ്ങളുടെയും സാന്നിധ്യവും കണ്ടെത്തിയിട്ടുണ്ട്. മൗണ്ടൻ റെസ്ക്യൂ ടീമിന്റെ സഹായവും സഞ്ചാരികൾക്കായി പാതയിൽ ലഭ്യമാക്കും.