ആഗോള സുസ്ഥിരതാ റാങ്കിംഗിൽ മികച്ച നേട്ടവുമായി അബുദാബി യൂണിവേഴ്സിറ്റി

അബുദാബി : ടൈംസ് ഹയർ എജ്യുക്കേഷൻ സുസ്ഥിരതാ ഇംപാക്ട് റാങ്കിംഗിൽ (Times Higher Education Sustainability Impact Ratings 2026) ലോകത്തെ മികച്ച 400 സർവ്വകലാശാലകളുടെ പട്ടികയിൽ ഇടംപിടിച്ച് അബുദാബി യൂണിവേഴ്സിറ്റി (ADU). ലോകമെമ്പാടുമുള്ള 1,603 സർവ്വകലാശാലകളിൽ 301-400 വിഭാഗത്തിലാണ് അബുദാബി യൂണിവേഴ്സിറ്റി സ്ഥാനം നേടിയത്. ഇതോടെ യുഎഇയിൽ പങ്കെടുത്ത 12 ഉന്നതവിദ്യാഭ്യാസ സ്ഥാപനങ്ങളിൽ മറ്റ് രണ്ട് സ്ഥാപനങ്ങൾക്കൊപ്പം ആറാം സ്ഥാനത്തെത്താനും യൂണിവേഴ്സിറ്റിക്ക് സാധിച്ചു. യുഎൻ സുസ്ഥിര വികസന ലക്ഷ്യങ്ങൾ (SDGs) മുൻനിർത്തിയുള്ള വിദ്യാഭ്യാസ, ഗവേഷണ പ്രവർത്തനങ്ങളാണ് നേട്ടത്തിന് പിന്നിൽ.
വിവിധ സുസ്ഥിര വികസന ലക്ഷ്യങ്ങളിൽ മികച്ച മുന്നേറ്റമാണ് യൂണിവേഴ്സിറ്റി നടത്തിയത്. ‘അസമത്വങ്ങൾ കുറയ്ക്കൽ’ (SDG 10) എന്ന വിഭാഗത്തിൽ ആഗോളതലത്തിൽ 14-ാം സ്ഥാനവും യുഎഇയിൽ ഒന്നാം സ്ഥാനവും നേടാൻ സാധിച്ചു. ‘മാന്യമായ ജോലിയും സാമ്പത്തിക വളർച്ചയും’ (SDG 8) എന്ന ലക്ഷ്യത്തിൽ ആഗോളതലത്തിൽ 76-ാം സ്ഥാനത്താണ്. കൂടാതെ ഗുണനിലവാരമുള്ള വിദ്യാഭ്യാസം, വ്യവസായം, നവീകരണം തുടങ്ങിയ മേഖലകളിലും യൂണിവേഴ്സിറ്റി മികച്ച റാങ്കിംഗ് സ്വന്തമാക്കി. ഈ ചരിത്രനേട്ടം സമൂഹത്തിന് കൂടുതൽ മൂല്യം സൃഷ്ടിക്കുന്നതിനും ഭാവി തലമുറയെ സുസ്ഥിര വികസനത്തിനായി പ്രാപ്തരാക്കുന്നതിനും സഹായിക്കുമെന്ന് അബുദാബി യൂണിവേഴ്സിറ്റി ചാൻസലർ പ്രൊഫസർ ഗസ്സാൻ ഔവ്വാദ് വ്യക്തമാക്കി.