യുഎഇ: കള്ളപ്പണം വെളുപ്പിക്കൽ, ഭീകരവാദ ധനസഹായം എന്നിവ തടയുന്നതിനായി നിരീക്ഷണ സംവിധാനങ്ങൾ കൂടുതൽ കർക്കശമാക്കാൻ യു.എ.ഇ തീരുമാനിച്ചു. സാമ്പത്തിക കുറ്റകൃത്യങ്ങളെക്കുറിച്ച് അന്വേഷിക്കുന്നതിനും അനധികൃത സ്വത്തുക്കൾ കണ്ടുകെട്ടുന്നതിനുമുള്ള കൃത്യമായ നടപടിക്രമങ്ങൾ അടങ്ങിയ ‘നാഷണൽ ഗൈഡ് ഓൺ ഫിനാൻഷ്യൽ ഇന്റലിജൻസ്’ കമ്മിറ്റി അംഗീകരിച്ചു. വെർച്വൽ അസറ്റുകളെയും (Virtual Assets) ഈ അന്വേഷണ പരിധിയിൽ ഉൾപ്പെടുത്താനും അവയുമായി ബന്ധപ്പെട്ട ആസ്തികൾ കണ്ടുകെട്ടാനും പുതിയ തീരുമാനത്തിലൂടെ സാധിക്കും.
റാസൽഖൈമ: പശ്ചിമേഷ്യൻ സംഘർഷങ്ങളുടെ പശ്ചാത്തലത്തിലും തളരാതെ യുഎഇയുടെ ടൂറിസം മേഖല. പ്രമുഖ വിനോദസഞ്ചാര കേന്ദ്രമായ റാസൽഖൈമയിൽ (RAK) സ്റ്റേക്കേഷനായി എത്തുന്നവരുടെ എണ്ണത്തിൽ വൻ വർധനവാണ് രേഖപ്പെടുത്തുന്നത്. നിലവിൽ എമിറേറ്റിലെ ഹോട്ടലുകളിൽ 70 മുതൽ 90 ശതമാനം വരെ ബുക്കിംഗ് നടന്നു കഴിഞ്ഞതായാണ് കണക്കുകൾ സൂചിപ്പിക്കുന്നത്.
ദുബായ്: വിമാനക്കമ്പനികൾക്കും ട്രാവൽ ഏജൻസികൾക്കുമെതിരെ പരാതി നൽകാൻ പുതിയ ഡിജിറ്റൽ പ്ലാറ്റ്‌ഫോം അവതരിപ്പിച്ച് ദുബായ് സിവിൽ ഏവിയേഷൻ അതോറിറ്റി (DCAA). യാത്രക്കാരുടെ അവകാശങ്ങൾ സംരക്ഷിക്കുന്നതിനും തർക്കങ്ങൾ വേഗത്തിൽ പരിഹരിക്കുന്നതിനുമായാണ് ഈ പുതിയ സംവിധാനം ഒരുക്കിയിരിക്കുന്നത്.
വിമാനങ്ങൾ വൈകുക, ടിക്കറ്റ് റദ്ദാക്കുക അല്ലെങ്കിൽ മറ്റ് സേവനങ്ങളിലെ പോരായ്മകൾ എന്നിവ നേരിടുന്ന യാത്രക്കാർക്ക് ഇനി അതോറിറ്റിയെ സമീപിക്കാം.
വെബ്‌സൈറ്റ് വഴി സമർപ്പിക്കുന്ന പരാതികളുടെ നിലവിലെ സ്ഥിതി (Status) തത്സമയം അറിയാനുള്ള സൗകര്യവും പ്ലാറ്റ്‌ഫോമിലുണ്ട്.
ദുബായ് വഴി യാത്ര ചെയ്യുന്നവർക്കും ദുബായിലേക്ക് എത്തുന്നവർക്കും മികച്ച യാത്രാനുഭവം ഉറപ്പാക്കുക, സേവനങ്ങളിൽ സുതാര്യത കൊണ്ടുവരിക എന്നിവയാണ് ഈ പുതിയ നീക്കത്തിലൂടെ അതോറിറ്റി ലക്ഷ്യമിടുന്നത്.
യുഎഇ: ആഗോള ഊർജ്ജ വിപണിയെ പുനർനിർണ്ണയിക്കുന്ന വമ്പൻ തീരുമാനവുമായി യു.എ.ഇ രംഗത്ത്. പെട്രോളിയം കയറ്റുമതി രാജ്യങ്ങളുടെ കൂട്ടായ്മയായ ‘ഒപെക്’ (OPEC), ‘ഒപെക് പ്ലസ്’ എന്നിവയിൽ നിന്ന് രാജ്യം ഔദ്യോഗികമായി പിന്മാറുന്നു. 2026 മേയ് 1 മുതലാണ് ഈ തീരുമാനം നടപ്പിലാകുക.
നിലവിലെ ആഗോള സാഹചര്യങ്ങളിൽ എണ്ണ ഉൽപാദനത്തിലും വിതരണത്തിലും കൂടുതൽ സ്വയംഭരണാധികാരം ഉറപ്പാക്കുക എന്നതാണ് ഈ നീക്കത്തിന് പിന്നിലെ ലക്ഷ്യം. ഹോർമുസ് ഉൾപ്പെടെയുള്ള മേഖലകളിലെ തടസ്സങ്ങൾ ബാധിക്കാതെ എണ്ണ ഉൽപാദന മേഖലയുടെ സുസ്ഥിരത നിലനിർത്താനും, രാജ്യത്തിന്റെ ദീർഘകാല സാമ്പത്തിക താൽപ്പര്യങ്ങൾ സംരക്ഷിക്കാനും ഈ മാറ്റം അനിവാര്യമാണെന്ന് അധികൃതർ വ്യക്തമാക്കുന്നു. കൂടുതൽ സ്വതന്ത്രമായ എണ്ണ നയങ്ങളിലൂടെ ഭാവിയിലെ ഊർജ്ജ വികസനത്തിന് പുതിയ വേഗത കൈവരിക്കാനാണ് യു.എ.ഇ ഇതിലൂടെ ലക്ഷ്യമിടുന്നത്.
ദുബായ്: സന്ദർശകരെ കാത്തിരിക്കുന്നത് വമ്പൻ സർപ്രൈസ് ദുബായ് സഫാരി പാർക്ക്. തങ്ങളുടെ ഏഴാം സീസൺഅവസാനിക്കാൻ ആഴ്ചകൾ മാത്രം ബാക്കിനിൽക്കെ ആകർഷകമായ ഓഫറുകൾ പ്രഖ്യാപിച്ചു. കുടുംബങ്ങൾക്കും വിനോദസഞ്ചാരികൾക്കും ഒരുപോലെ പ്രയോജനപ്പെടുന്ന രീതിയിലാണ് പുതിയ ഇളവുകൾ ഒരുക്കിയിരിക്കുന്നത്.
രണ്ട് ടിക്കറ്റെടുത്താല്‍ രണ്ട് ടിക്കറ്റ് സൗജന്യമായി ലഭിക്കുന്ന ബൈ ടു ഗെറ്റ് 2 ഫ്രീ ഓഫറും 12 വയസില്‍ താഴെയുള്ള രണ്ട് കുട്ടികള്‍ക്ക് സൗജന്യ പ്രവേശനം അനുവദിക്കുന്ന കിഡ്സ് ഗോ ഫ്രീ ഓഫറുമാണ് ഇതില്‍ പ്രധാനം.
ദുബായ്: ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി (DEWA) വൈദ്യുതി വിതരണത്തിലെ കൃത്യനിഷ്ഠയിൽ തങ്ങളുടെ തന്നെ ആഗോള റെക്കോർഡ് തിരുത്തിക്കൊണ്ട് ചരിത്രപരമായ നേട്ടം കൈവരിച്ചിരിക്കുകയാണ്. ഏറ്റവും പുതിയ കണക്കുകൾ പ്രകാരം, ദുബായിൽ ഒരു ഉപഭോക്താവിന് ഒരു വർഷത്തിൽ ശരാശരി 0.82 മിനിറ്റ് (ഏകദേശം 49 സെക്കൻഡ്) മാത്രമാണ് വൈദ്യുതി തടസ്സം നേരിടുന്നത്. 2024-ൽ സ്ഥാപിച്ച 0.94 മിനിറ്റ് എന്ന റെക്കോർഡിനേക്കാൾ 13 ശതമാനം പുരോഗതിയാണ് ഇതിലൂടെ കൈവരിച്ചിരിക്കുന്നത്. യുഎഇ ഉപരാഷ്ട്രപതിയും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ ദീർഘവീക്ഷണത്തിനനുസൃതമായി, ലോകത്തിലെ ഏറ്റവും മികച്ച അടിസ്ഥാന സൗകര്യങ്ങൾ ഒരുക്കുന്നതിന്റെ ഭാഗമായാണ് ഈ നേട്ടമെന്ന് DEWA എം.ഡി.യും സി.ഇ.ഒ.യുമായ സയീദ് മുഹമ്മദ് അൽ തായർ വ്യക്തമാക്കി.
ഈ വിസ്മയിപ്പിക്കുന്ന വിജയത്തിന് പിന്നിൽ 2035-ഓടെ 700 കോടി ദിർഹം നിക്ഷേപം ലക്ഷ്യമിടുന്ന DEWA-യുടെ വിപുലമായ ‘സ്മാർട്ട് ഗ്രിഡ്’ പദ്ധതിയാണ്. നിർമ്മിത ബുദ്ധിയും (AI) നാലാം വ്യവസായ വിപ്ലവത്തിലെ അത്യാധുനിക സാങ്കേതിക വിദ്യകളും പൂർണ്ണമായും സംയോജിപ്പിച്ചുകൊണ്ടാണ് അതോറിറ്റി പ്രവർത്തിക്കുന്നത്. മിഡിൽ ഈസ്റ്റിലും വടക്കേ ആഫ്രിക്കയിലും ആദ്യമായി നടപ്പിലാക്കിയ ‘ഓട്ടോമാറ്റിക് സ്മാർട്ട് ഗ്രിഡ് റിസ്റ്റോറേഷൻ സിസ്റ്റം’ ഇതിൽ പ്രധാന പങ്കുവഹിക്കുന്നു. മനുഷ്യസഹായമില്ലാതെ തന്നെ തകരാറുകൾ സെക്കൻഡുകൾക്കുള്ളിൽ കണ്ടെത്താനും വൈദ്യുതി പുനഃസ്ഥാപിക്കാനും ഈ സംവിധാനത്തിലൂടെ സാധിക്കുന്നു. ദുബായ് ഇക്കണോമിക് അജണ്ട (D33), ദുബായ് 2040 അർബൻ മാസ്റ്റർ പ്ലാൻ എന്നിവയുടെ ഭാഗമായി ലോകത്തെ മികച്ച മൂന്ന് നഗരങ്ങളിൽ ഒന്നായി ദുബായെ മാറ്റുക എന്ന ലക്ഷ്യത്തിലേക്കുള്ള സുപ്രധാന ചുവടുവെപ്പാണിത്.
ദുബായ്: നഗരത്തിലെ റോഡുകളിലും സൈക്കിൾ ട്രാക്കുകളിലും സുരക്ഷ ഉറപ്പാക്കുന്നതിനായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയും (RTA) ദുബായ് പോലീസും സംയുക്തമായി പുതിയ നിരീക്ഷണ സംവിധാനം ഏർപ്പെടുത്തുന്നു. ‘പേഴ്സണൽ മൊബിലിറ്റി മോണിറ്ററിംഗ് യൂണിറ്റ്’ (Personal Mobility Monitoring Unit) എന്ന് പേരിട്ടിരിക്കുന്ന ഈ വിഭാഗം 2026 മേയ് 1 മുതൽ പ്രവർത്തനം ആരംഭിക്കും.
ഇ-സ്കൂട്ടറുകൾ, സൈക്കിളുകൾ തുടങ്ങിയവ ഉപയോഗിക്കുന്നവർ ട്രാഫിക് നിയമങ്ങൾ പാലിക്കുന്നുണ്ടെന്ന് ഉറപ്പാക്കുകയാണ് ഈ പദ്ധതിയുടെ ലക്ഷ്യം.
യുഎഇ: യുഎഇയിൽ നിന്ന് കേരളം ഉൾപ്പെടെ ഇന്ത്യയിലെ വിവിധ നഗരങ്ങളിലേക്ക് കൂടുതൽ വിമാന സർവീസുകൾ പ്രഖ്യാപിച്ച് എയർ ഇന്ത്യ എക്സ്പ്രസ്. ഏപ്രിൽ 30 വരെ കൊച്ചി, കോഴിക്കോട്, മംഗളൂരു തുടങ്ങി പ്രധാന സെക്ടറുകളിലേക്കാണ് പുതിയ സർവീസുകൾ ഏർപ്പെടുത്തിയിരിക്കുന്നത്. മേഖലയിലെ സംഘർഷങ്ങളെത്തുടർന്ന് നേരത്തെ വെട്ടിക്കുറച്ച സർവീസുകളാണ് ഇപ്പോൾ ഘട്ടം ഘട്ടമായി പുനരാരംഭിക്കുന്നത്.
നിലവിൽ ഇത്തിഹാദ്, എമിറേറ്റ്സ്, ഫ്ലൈ ദുബായ്, എയർ അറേബ്യ തുടങ്ങിയ വിമാനക്കമ്പനികൾ സർവീസ് നടത്തുന്നുണ്ടെങ്കിലും ടിക്കറ്റ് നിരക്ക് വളരെ കൂടുതലാണ്. എന്നാൽ മെയ് ഒന്ന് മുതൽ ഇന്ത്യൻ വിമാനക്കമ്പനികൾ കൂടുതൽ സർവീസുകൾ ആരംഭിക്കുന്നതോടെ വിപണിയിൽ മത്സരം മുറുകുമെന്നും, ഇത് ടിക്കറ്റ് നിരക്ക് കുറയാൻ കാരണമാകുമെന്നുമാണ് പ്രവാസികളുടെ പ്രതീക്ഷ.
യുഎഇ: ഉപഭോക്താക്കളെ ചൂഷണം ചെയ്യുന്ന രീതിയിൽ വിപണിയിൽ കൃത്രിമമായി വില വർദ്ധിപ്പിക്കുന്നവർക്കെതിരെ കർശന മുന്നറിയിപ്പുമായി യുഎഇ പബ്ലിക് പ്രോസിക്യൂഷൻ. 2023-ലെ 36-ാം നമ്പർ ഫെഡറൽ നിയമപ്രകാരം (Competition Law) വിപണിയിലെ മത്സര നിയമങ്ങൾ ലംഘിക്കുന്നവർക്കെതിരെ കടുത്ത ശിക്ഷാനടപടികൾ സ്വീകരിക്കുമെന്ന് അധികൃതർ വ്യക്തമാക്കി.
നിയമലംഘനം നടത്തുന്ന സ്ഥാപനങ്ങൾക്ക് കുറഞ്ഞത് 1,00,000 ദിർഹം മുതൽ ആകെ വാർഷിക വിറ്റുവരവിന്റെ (Annual Sales) 10 ശതമാനം വരെ പിഴ ചുമത്താം.
വാർഷിക വിറ്റുവരവ് കൃത്യമായി ബോധിപ്പിക്കാൻ സാധിക്കാത്ത സ്ഥാപനങ്ങൾക്കും വ്യക്തികൾക്കും കുറഞ്ഞത് 5,00,000 ദിർഹം മുതൽ 50,00,000 ദിർഹം വരെ പിഴ നൽകേണ്ടി വരും.
