യുഎഇയിൽ സ്വർണ്ണവില കുറഞ്ഞു

ദുബായ് : ആഗോള വിപണിയിലെ മാറ്റങ്ങളെ തുടർന്ന് ഈ വാരത്തിന്റെ തുടക്കത്തിൽ യുഎഇയിൽ സ്വർണ്ണവിലയിൽ നേരിയ ഇടിവ് രേഖപ്പെടുത്തി. തിങ്കളാഴ്ച രാവിലെ യുഎഇയിൽ 24 കാരറ്റ് സ്വർണ്ണത്തിന് ഗ്രാമിന് 501 ദിർഹത്തിലാണ് വ്യാപാരം നടക്കുന്നത്. കഴിഞ്ഞ വാരവസാനം ഇത് 503 ദിർഹമായിരുന്നു.
മറ്റ് വകഭേദങ്ങളായ 22 കാരറ്റിന് 464 ദിർഹം, 21 കാരറ്റിന് 445 ദിർഹം, 18 കാരറ്റിന് 381.25 ദിർഹം എന്നിങ്ങനെയാണ് രാവിലെ രേഖപ്പെടുത്തിയ നിരക്കുകൾ. ആഗോള വിപണിയിൽ സ്പോട്ട് ഗോൾഡ് വില 0.67 ശതമാനം ഇടിഞ്ഞ് ഔൺസിന് 4,155 ഡോളറിലെത്തി. യുഎസ് ഫെഡറൽ റിസർവ് പലിശനിരക്കുകൾ നേരത്തെ വർദ്ധിപ്പിച്ചേക്കാമെന്ന സൂചനകളും പ്രമുഖ ബാങ്കുകളായ ഗോൾഡ്മാൻ സാക്സ്, ജെപി മോർഗൻ എന്നിവരുടെ വിലയിരുത്തലുകളുമാണ് നിലവിൽ സ്വർണ്ണവിലയിൽ നേരിയ കുറവുണ്ടാകാൻ കാരണം.