അബുദാബി : മിഡിൽ ഈസ്റ്റിലെ പ്രാദേശിക സംഘർഷങ്ങളുടെ പശ്ചാത്തലത്തിൽ വിദേശകാര്യ മന്ത്രാലയം യാത്രാ നിർദ്ദേശങ്ങൾ പുതുക്കിയെങ്കിലും, യുഎഇയിലേക്കുള്ള ‘ഗ്രീൻ’ (സുരക്ഷിത) സ്റ്റാറ്റസിൽ മാറ്റമില്ലെന്ന് ബ്രിട്ടീഷ് എംബസി വ്യക്തമാക്കി. നിലവിലെ സാഹചര്യങ്ങളെക്കുറിച്ചുള്ള ചില വിവരങ്ങൾ മാത്രമാണ് പുതുക്കിയ നിർദ്ദേശത്തിൽ ചേർത്തതെന്നും യുഎഇ പൂർണ്ണ സുരക്ഷിതമാണെന്നും അധികൃതർ അറിയിച്ചു. യുഎഇയിലുള്ള ബ്രിട്ടീഷ് പൗരന്മാർ പ്രാദേശിക ഭരണകൂടത്തിന്റെ നിർദ്ദേശങ്ങൾ കൃത്യമായി പാലിക്കണമെന്നും കൃത്യമായ യാത്രാ ഇൻഷുറൻസ് ഉറപ്പാക്കണമെന്നും എംബസി നിർദ്ദേശിച്ചിട്ടുണ്ട്.
