Raneesha Nizar

ദുബായ് : ലോകത്തിലെ ഏറ്റവും സിവിലൈസ്ഡ് (Civilised) നഗരമായി ദുബായെ മാറ്റിയെടുക്കുകയെന്ന ലക്ഷ്യത്തോടെ പൊതുസ്ഥലങ്ങളിലെ പെരുമാറ്റത്തിനും ആഘോഷങ്ങൾക്കും ഔദ്യോഗിക മാർഗ്ഗനിർദ്ദേശങ്ങൾ പുറത്തിറക്കാൻ ദുബായ് ഭരണകൂടം ഒരുങ്ങുന്നു. ഈ ആഴ്ച ചേർന്ന ‘ദുബായ് സിവിലിറ്റി കമ്മിറ്റി’യുടെ (Dubai Civility Committee) അഞ്ചാമത് യോഗത്തിലാണ് രണ്ട് പ്രധാന പദ്ധതികൾ പ്രഖ്യാപിച്ചത്. പൊതുസ്ഥലങ്ങളിൽ പാലിക്കേണ്ട മര്യാദകളെക്കുറിച്ചുള്ള ‘ദുബായ് സിവിലിറ്റി ഗൈഡ്‌ബുക്ക്’, വിവിധ ആഘോഷങ്ങളിൽ പുലർത്തേണ്ട ഉത്തരവാദിത്തങ്ങളെക്കുറിച്ചുള്ള ‘ആഘോഷങ്ങൾക്കായുള്ള മാർഗ്ഗനിർദ്ദേശങ്ങൾ’ എന്നിവയാണ് പുതുതായി തയ്യാറാക്കുന്നത്. എക്സിക്യൂട്ടീവ് ഓഫീസ് ചെയർമാനും സിവിലിറ്റി കമ്മിറ്റി തലവനുമായ മുഹമ്മദ് അബ്ദുള്ള അൽ ഗർഗാവി യോഗത്തിൽ അധ്യക്ഷത വഹിച്ചു. കേവലം അടിസ്ഥാന സൗകര്യങ്ങൾ മാത്രമല്ല, നഗരത്തിന്റെ മനോഹാരിതയും പോസിറ്റീവായ പൊതുപെരുമാറ്റവും ഉറപ്പാക്കി ജനങ്ങളുടെ ജീവിതനിലവാരം ഉയർത്തുകയാണ് ഈ പദ്ധതിയിലൂടെ ലക്ഷ്യമിടുന്നത്. നഗരത്തിന്റെ ദൃശ്യഭംഗി വർദ്ധിപ്പിക്കുന്നതിനായി സംയോജിത ലൈറ്റിംഗ് തന്ത്രവും യോഗത്തിൽ ചർച്ച ചെയ്തു.