അബുദാബി : പ്രാദേശികമായി ഉൽപ്പാദിപ്പിക്കുന്ന ഉൽപ്പന്നങ്ങളുടെ ഗുണനിലവാരം മെച്ചപ്പെടുത്തി ആഗോള വിപണിയിലേക്ക് എത്തിക്കുന്നതിനുള്ള തന്ത്രപ്രധാന പദ്ധതികളുമായി യുഎഇ. ആഭ്യന്തര ഉൽപ്പാദനം, നൂതന സാങ്കേതികവിദ്യ, വിതരണ ശൃംഖല, അന്താരാഷ്ട്ര വിപണി എന്നിവയെ സമന്വയിപ്പിച്ച് ദേശീയ സാമ്പത്തിക രംഗത്തെ കൂടുതൽ ശക്തമാക്കാനാണ് രാജ്യം ലക്ഷ്യമിടുന്നത്. കൃഷി, ഭക്ഷ്യോത്പാദനം, നിർമ്മാണ മേഖല എന്നിവയെ ശക്തിപ്പെടുത്തുന്നതോടൊപ്പം സ്വദേശി ഉൽപ്പന്നങ്ങൾക്ക് അന്താരാഷ്ട്ര വിപണിയിൽ വ്യക്തമായ മേൽവിലാസം സൃഷ്ടിക്കാനും പുതിയ പദ്ധതികൾ സഹായിക്കും.
ഇതിന്റെ ഭാഗമായി യുഎഇയിലെ 80 ശതമാനം ഫാമുകൾക്കും ‘യുഎഇ ജിഎപി’ (UAE GAP) സർട്ടിഫിക്കേഷൻ ലഭ്യമാക്കാനും റസ്റ്റോറന്റുകളിലും ഹോട്ടലുകളിലും പ്രാദേശിക കാർഷിക ഉൽപ്പന്നങ്ങളുടെ വിഹിതം 25 ശതമാനമായി ഉയർത്താനും നീക്കമുണ്ട്. വ്യവസായ മേഖലയുടെ ശാക്തീകരണത്തിനായി 100 കോടി ദിർഹമിന്റെ ‘നാഷണൽ ഇൻഡസ്ട്രിയൽ റെസിലിയൻസ് ഫണ്ട്’ വകയിരുത്തിയിട്ടുണ്ട്. തദ്ദേശീയ വ്യവസായങ്ങളെ പ്രോത്സാഹിപ്പിക്കാനും കൃത്രിമബുദ്ധി (AI) സാങ്കേതികവിദ്യ ഉപയോഗിച്ച് വിതരണ ശൃംഖലകൾ കൂടുതൽ കാര്യക്ഷമമാക്കാനും ഈ നിക്ഷേപം സഹായിക്കും.
