ദുബായ് : കടൽ മാർഗ്ഗമുള്ള വിനോദസഞ്ചാരവും യാത്രാസൗകര്യങ്ങളും കൂടുതൽ മെച്ചപ്പെടുത്തുന്നതിനായി പുതിയ ‘ദുബായ് സീ ഗസ്റ്റ് പിക്ക് അപ്പ് ആൻഡ് ഡ്രോപ്പ്’ (Dubai Sea Guests Pick-Up and Drop-Off) പദ്ധതി പ്രഖ്യാപിച്ച് പോർട്ട്സ്, കസ്റ്റംസ് ആൻഡ് ഫ്രീ സോൺ കോർപ്പറേഷൻ. ദുബായ് മാരിടൈം അതോറിറ്റിയുടെ കീഴിൽ രജിസ്റ്റർ ചെയ്തിട്ടുള്ള സ്വകാര്യ ബോട്ടുകളിലെയും വിദേശ ലക്ഷ്വറി ബോട്ടുകളിലെയും (Yachts) യാത്രക്കാർക്ക് വിവിധ കടൽത്തീരങ്ങൾക്കിടയിൽ സുഗമമായി യാത്ര ചെയ്യാൻ ഈ സേവനം സഹായിക്കും.
പോർട്ട് റാഷിദ്, ജുമൈറ 1, ദുബായ് ഹാർബർ, ജെഎ ഹോട്ടൽ മറീനകൾ വഴി ഈ സേവനം 24 മണിക്കൂറും ലഭ്യമാകും. നിലവിൽ അതോറിറ്റിക്ക് കീഴിൽ 3,491 സ്വകാര്യ ബോട്ടുകൾ രജിസ്റ്റർ ചെയ്തിട്ടുണ്ട്. ഇതുകൂടാതെ ലക്ഷ്വറി ബോട്ടുകൾക്കായി 4,214 ബർത്തുകളുള്ള 20 മറീനകളും ദുബായിലുണ്ട്. സന്ദർശകർക്ക് കൂടുതൽ സുരക്ഷിതവും സൗകര്യപ്രദവുമായ യാത്രാനുഭവം നൽകുന്നതിലൂടെ ആഗോള മറൈൻ ടൂറിസം രംഗത്ത് ദുബായുടെ സ്ഥാനം കൂടുതൽ ശക്തമാക്കാൻ ഈ പദ്ധതിക്ക് സാധിക്കുമെന്ന് മാരിടൈം എക്സലൻസ് ഡയറക്ടർ മുഹമ്മദ് നഭാൻ വ്യക്തമാക്കി.
