അബുദാബി : ഡ്രൈവിംഗിനിടെ മൊബൈൽ ഫോണിൽ റീൽസുകളും (Reels) വീഡിയോകളും കാണുന്നത് ഗുരുതരമായ ഗതാഗത നിയമലംഘനമാണെന്നും, ഇത്തരക്കാർക്കെതിരെ 800 ദിർഹം പിഴയും 4 ബ്ലാക്ക് പോയിന്റും ചുമത്തുമെന്നും അബുദാബി പോലീസ് മുന്നറിയിപ്പ് നൽകി. ഡ്രൈവിംഗിലെ ശ്രദ്ധ തിരിക്കൽ (Distracted Driving) എന്ന വിഭാഗത്തിലാണ് ഈ കുറ്റം ഉൾപ്പെടുന്നത്. അതേസമയം, ഫോൺ കയ്യിൽ പിടിക്കാതെ സുരക്ഷിതമായ സ്ഥലത്ത് ഉറപ്പിച്ചു നിർത്തി ജിപിഎസ് (GPS) മാപ്പുകൾ ഉപയോഗിക്കുന്നത് നിയമലംഘനമല്ലെന്ന് അബുദാബി ട്രാഫിക് ആൻഡ് സെക്യൂരിറ്റി പട്രോൾസ് ഡയറക്ടറേറ്റ് വ്യക്തമാക്കി.
ഡ്രൈവിംഗിനിടെ റീൽസ് കാണുന്നത് മൂലം ശ്രദ്ധമാറി വാഹനം കൂട്ടിയിടിച്ച് വൻ അപകടങ്ങൾ ഉണ്ടാകുന്നതിന്റെ ലൈവ് ദൃശ്യങ്ങൾ അബുദാബി പോലീസിന്റെ സർവൈലൻസ് ക്യാമറകളിൽ പതിഞ്ഞിട്ടുണ്ട്. കൂടാതെ റെഡ് സിഗ്നൽ തെറ്റിക്കുന്നതിനെതിരെയും പോലീസ് ശക്തമായ മുന്നറിയിപ്പ് നൽകി. ഡ്രൈവിംഗിനിടെയുള്ള ലൈവ് സ്ട്രീമിംഗും സോഷ്യൽ മീഡിയ ഉപയോഗവുമാണ് അപകടങ്ങൾക്ക് പ്രധാന കാരണമെന്ന് നിരീക്ഷിച്ച പോലീസ്, കഴിഞ്ഞ ദിവസം വാഹനം ഓടിക്കുന്നതിനിടെ ലൈവ് സ്ട്രീമിംഗ് നടത്തിയ ഡ്രൈവറെ അറസ്റ്റ് ചെയ്തതായും അറിയിച്ചു. 20 മുതൽ 30 വയസ്സ് വരെയുള്ള യുവാക്കളാണ് ഇത്തരം നിയമലംഘനങ്ങൾ കൂടുതൽ നടത്തുന്നതെന്ന് സ്ഥിതിവിവരക്കണക്കുകൾ വ്യക്തമാക്കുന്നു.
8