അബുദാബി : 2026-27 അധ്യയന വർഷത്തിൽ സ്കൂൾ വളപ്പിലും ഡിജിറ്റൽ നെറ്റ്‌വർക്കുകളിലും വിദ്യാർത്ഥികൾ വിപിഎൻ (VPN) ആപ്പുകൾ ഉപയോഗിക്കുന്നത് യുഎഇയിലെ സ്വകാര്യ വിദ്യാലയങ്ങൾ നിരോധിച്ചു. വിദ്യാഭ്യാസ ആവശ്യങ്ങൾക്കോ ഭരണപരമായ ആവശ്യങ്ങൾക്കോ അല്ലാതെ സ്വകാര്യ വെർച്വൽ പ്ലാറ്റ്‌ഫോമുകൾ ഉപയോഗിക്കുന്നതിനും വിദ്യാർത്ഥികൾക്ക് ഇനി അനുമതിയുണ്ടായിരിക്കില്ല. ഇൻ്റർനെറ്റ് സുരക്ഷ ശക്തിപ്പെടുത്തുന്നതിന്റെ ഭാഗമായി സ്കൂളുകൾ തങ്ങളുടെ ഉത്തരവാദിത്ത ഡിജിറ്റൽ ഉപയോഗ നയം രക്ഷിതാക്കളെയും വിദ്യാർത്ഥികളെയും അറിയിച്ചു കഴിഞ്ഞു.
വിദ്യാർത്ഥികൾ ഓൺലൈനിൽ നേരിടാൻ സാധ്യതയുള്ള നാല് പ്രധാന അപകടസാധ്യതകളും സ്കൂളുകൾ ചൂണ്ടിക്കാണിച്ചിട്ടുണ്ട്. അനുചിതമായ ഉള്ളടക്കങ്ങൾ കാണൽ, അപരിചിതരുമായുള്ള സുരക്ഷിതമല്ലാത്ത ആശയവിനിമയം, സൈബർ ബുളീയിംഗ് ഉൾപ്പെടെയുള്ള ദോഷകരമായ പെരുമാറ്റങ്ങൾ, തട്ടിപ്പുകളും സാമ്പത്തിക നഷ്ടങ്ങളും എന്നിവയാണവ. ഇത്തരം ഭീഷണികളിൽ നിന്ന് വിദ്യാർത്ഥികളെ സംരക്ഷിക്കാൻ പ്രത്യേക ഫിൽട്ടറിംഗ് സംവിധാനങ്ങളും മോണിറ്ററിംഗ് രീതികളും സ്കൂളുകളിൽ ഏർപ്പെടുത്തിയിട്ടുണ്ട്.
സ്കൂൾ സമയത്തിന് പുറത്ത് കുട്ടികളുടെ ഡിജിറ്റൽ ഉപകരണങ്ങളുടെ ഉപയോഗം രക്ഷിതാക്കൾ കൃത്യമായി നിരീക്ഷിക്കണമെന്ന് സ്കൂൾ അധികൃതർ അഭ്യർത്ഥിച്ചു. കുട്ടികളെ അമിതമായി നിയന്ത്രിക്കുന്നതിന് പകരം വ്യക്തമായ അതിരുകൾ നിശ്ചയിച്ച് സൈബർ ഭീഷണികളെക്കുറിച്ച് ബോധവൽക്കരണം നൽകാനാണ് വിദഗ്ധർ നിർദ്ദേശിക്കുന്നത്.
16