തൊഴിൽ ആസൂത്രണത്തിന് എഐ സാങ്കേതികവിദ്യയുമായി ദുബായ് പോലീസ്

ദുബായ് : ജീവനക്കാരുടെ തൊഴിൽ ആസൂത്രണം കൂടുതൽ സ്മാർട്ടാക്കാനും കാര്യക്ഷമമാക്കാനും ലക്ഷ്യമിട്ട് ദുബായ് പോലീസും ഡിജിറ്റൽ ദുബായിയും ചേർന്ന് ആർട്ടിഫിഷ്യൽ ഇന്റലിജൻസ് (എഐ) സംവിധാനം പുറത്തിറക്കി. ജീവനക്കാരുടെ കഴിവുകളും വൈദഗ്ധ്യവും പ്രവർത്തനപരമായ ആവശ്യകതകളുമായി പൊരുത്തപ്പെടുത്തി ഉദ്യോഗസ്ഥരെ ഏറ്റവും അനുയോജ്യമായ രീതിയിൽ വിന്യതക്കാൻ സഹായിക്കുന്നതാണ് പുതിയ എഐ സംവിധാനം.

‘എഐ-അസിസ്റ്റഡ് ഷിഫ്റ്റ് മാനേജ്‌മെന്റ് സിസ്റ്റം’ (AI-Assisted Shift Management System) എന്നാണ് പുതിയ സാങ്കേതികവിദ്യയ്ക്ക് പേരിട്ടിരിക്കുന്നത്. ഷിഫ്റ്റ് പ്ലാനിങ് കൂടുതൽ വേഗതയേറിയതും കൃത്യവും ഡാറ്റാധിഷ്ഠിതവുമാക്കാൻ ഈ സംവിധാനം സഹായിക്കും. ജീവനക്കാരുടെ സന്നദ്ധതയും പ്രവർത്തനക്ഷമതയും മാനവവിഭവശേഷിയുടെ ഉപയോഗവും മെച്ചപ്പെടുത്താൻ ഇത് ഉപകരിക്കും.

പ്രവർത്തന ആവശ്യകതകൾ വിശകലനം ചെയ്ത് അംഗീകൃത നിയന്ത്രണങ്ങളുടെ അടിസ്ഥാനത്തിൽ ഉദ്യോഗസ്ഥരുടെ വിന്യാസം ശുപാർശ ചെയ്യാൻ ഈ സംവിധാനത്തിന് കഴിയും. തൊഴിൽ ആസൂത്രണം, നിർവ്വഹണം, നിരീക്ഷണം എന്നിവയെല്ലാം ഒരേ ഘടനയിലേക്ക് കൊണ്ടുവരുന്നതിലൂടെ ജീവനക്കാരുടെ വിന്യാസം, കവറേജ് ലെവലുകൾ, പ്രവർത്തന സന്നദ്ധത എന്നിവ തത്സമയം നിരീക്ഷിക്കാൻ തീരുമാനമെടുക്കുന്നവർക്ക് സാധിക്കും. ദുബായ് പോലീസിന്റെ രജിസ്റ്റർ ചെയ്ത ബുദ്ധിപരമായ സ്വത്തവകാശമായ (IP) ഈ സാങ്കേതികവിദ്യ, പരമ്പരാഗത ഷെഡ്യൂളിംഗ് രീതികളിൽ നിന്ന് മാറി മാറിക്കൊണ്ടിരിക്കുന്ന പ്രവർത്തന ആവശ്യങ്ങളോട് വേഗത്തിൽ പ്രതികരിക്കാൻ കഴിയുന്ന ഒരു സ്മാർട്ട് തൊഴിൽ മാനേജ്‌മെന്റ് മാതൃകയിലേക്കുള്ള ചുവടുവെപ്പാണ്.