അബുദാബി : ഗൾഫ് മേഖലയിലെ സുസ്ഥിരതയ്ക്കും സുരക്ഷയ്ക്കും യൂറോപ്യൻ യൂണിയനും ജിസിസി രാജ്യങ്ങളും തമ്മിലുള്ള സഹകരണവും ഹോർമുസ് കടലിടുക്കിലെ തടസ്സമില്ലാത്ത കപ്പൽ ഗതാഗത സ്വാതന്ത്ര്യവും നിർണ്ണായകമാണെന്ന് ഗൾഫ് മേഖലയിലെ ഇയു പ്രത്യേക പ്രതിനിധി ലൂയിജി ഡി മായോ. അബുദാബിയിൽ നടന്ന ‘ഹിലി ഫോറത്തിൽ’ (Hili Forum) സംസാരിക്കുകയായിരുന്നു അദ്ദേഹം. ജിസിസി രാജ്യങ്ങളുടെ സുരക്ഷ യൂറോപ്പിന്റെയും സുരക്ഷയാണെന്നും, നയതന്ത്ര ചർച്ചകളിലൂടെ ഇറാന്റെ ആണവായുധ സ്വപ്നങ്ങൾ തടയുക എന്നത് ഇരുവിഭാഗത്തിന്റെയും പൊതുവായ ലക്ഷ്യമാണെന്നും അദ്ദേഹം വ്യക്തമാക്കി.
തന്ത്രപ്രധാനമായ മൂന്ന് മുൻഗണനകളാണ് ഡി മായോ മുന്നോട്ടുവെച്ചത്: നയതന്ത്ര മേഖലയിലെ ബഹുമുഖ സഹകരണം, പ്രതിരോധ-സുരക്ഷാ ബന്ധങ്ങൾ ശക്തിപ്പെടുത്തൽ, ഇന്ത്യ-മിഡിൽ ഈസ്റ്റ്-യൂറോപ്പ് ഇക്കണോമിക് ഇടനാഴി (IMEC) ഉൾപ്പെടെയുള്ള വ്യാപാര-ഊർജ്ജ ശൃംഖലകൾ മെച്ചപ്പെടുത്തൽ എന്നിവയാണവ. മേഖലയുടെ ഭാവി സുരക്ഷാ ചർച്ചകളിൽ ജിസിസി രാജ്യങ്ങളെ ഒഴിവാക്കരുതെന്നും, അന്താരാഷ്ട്ര നിയമങ്ങൾ പാലിച്ചുകൊണ്ട് കടൽമാർഗ്ഗമുള്ള വ്യാപാരം സുരക്ഷിതമാക്കുന്നത് ആഗോള സാമ്പത്തിക ഭദ്രതയ്ക്ക് അത്യാവശ്യമാണെന്നും അദ്ദേഹം കൂട്ടിച്ചേർത്തു.
15