അബുദാബി : 2026-ന്റെ ആദ്യ പകുതിയിൽ യുഎഇയുടെ എണ്ണയിതര വിദേശവ്യാപാരം റെക്കോർഡ് നേട്ടമായ 1.94 ട്രില്യൺ ദിർഹമിലെത്തിയതായി വിദേശവ്യാപാര കാര്യ മന്ത്രി ഡോ. താനി ബിൻ അഹമ്മദ് അൽ സെ യൂദി. അബുദാബിയിൽ നടന്ന ഹിലി ഫോറത്തിന്റെ രണ്ടാം ദിനത്തിൽ സംസാരിക്കുകയായിരുന്നു അദ്ദേഹം. മുൻ വർഷത്തെ അപേക്ഷിച്ച് 13.1 ശതമാനത്തിന്റെയും, 2022-ലെ സമാന കാലയളവിനെ അപേക്ഷിച്ച് 80 ശതമാനത്തിന്റെയും വളർച്ചയാണ് രേഖപ്പെടുത്തിയത്. എണ്ണയിതര കയറ്റുമതി മാത്രം എക്കാലത്തെയും ഉയർന്ന നിരക്കായ 453 ബില്യൺ ദിർഹമിലെത്തി.
ഹോർമുസ് കടലിടുക്കിലെ തടസ്സങ്ങൾ മറികടക്കാൻ ഒമാനുമായി ചേർന്ന് സദൃശ്യ ലോജിസ്റ്റിക്സ് ശൃംഖലകളും ഫുജൈറ, ഖോർഫക്കാൻ തുറമുഖങ്ങളും സജീവമാക്കിയതായി മന്ത്രി വ്യക്തമാക്കി. അന്താരാഷ്ട്ര ജലപാതകളിലെ കപ്പൽ ഗതാഗത സ്വാതന്ത്ര്യം യുഎഇയുടെ ചുവപ്പ് വരയാണെന്നും അദ്ദേഹം കൂട്ടിച്ചേർത്തു. ഇതുവരെ 6 ഭൂഖണ്ഡങ്ങളിലായി 38 സമഗ്ര സാമ്പത്തിക പങ്കാളിത്ത കരാറുകളിൽ (CEPA) യുഎഇ ഒപ്പുവെച്ചിട്ടുണ്ട്. സാമ്പത്തിക പ്രതിസന്ധികളെ അവസരങ്ങളാക്കി മാറ്റി ആഗോള വ്യാപാര കേന്ദ്രമെന്ന നിലയിലുള്ള സ്ഥാനം യുഎഇ കൂടുതൽ ഉറപ്പിച്ചു.
19