യുഎഇയിൽ മഴയ്ക്കും പൊടിക്കാറ്റിനും സാധ്യത

ദുബായ് : യുഎഇയിലെ കിഴക്കൻ, തെക്കൻ മേഖലകളിൽ മഴയ്ക്കും കനത്ത കാറ്റിനും സാധ്യതയെന്ന് ദേശീയ കാലാവസ്ഥാ കേന്ദ്രം (NCM). അൽ ഐൻ, ഫുജൈറ, അൽ ഹിലാൽ ഉൾപ്പെടെയുള്ള മലയോര പ്രദേശങ്ങളിലും ഉൾനാടൻ മേഖലകളിലും മഴമേഘങ്ങൾ രൂപപ്പെടാൻ സാധ്യതയുണ്ട്. ചിലയിടങ്ങളിൽ കാറ്റ് ശക്തമാകുന്നതോടെ പൊടിപടലങ്ങൾ കാരണം കാഴ്ചമറയാൻ സാധ്യതയുള്ളതിനാൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.
മഴയ്ക്ക് സാധ്യതയുണ്ടെങ്കിലും രാജ്യത്ത് താപനില ഉയർന്ന നിലയിൽ തന്നെ തുടരും. അൽ ഐനിൽ താപനില 47 ഡിഗ്രി സെൽഷ്യസ് വരെ ഉയർന്നേക്കാം. പ്രധാന നഗരങ്ങളായ അബുദാബിയിൽ 43°C, ദുബായിൽ 42°C, ഷാർജയിൽ 41°C, അജ്മാനിൽ 40°C എന്നിങ്ങനെയാണ് കൂടിയ താപനില പ്രതീക്ഷിക്കുന്നത്. തീരദേശങ്ങളിൽ മണിക്കൂറിൽ 40 കി.മീ വേഗതയിലും ഉൾനാടൻ-മലയോര മേഖലകളിൽ 45 കി.മീ വേഗതയിലും വരെ കാറ്റടിക്കാൻ സാധ്യതയുണ്ടെങ്കിലും കടൽ പൊതുവെ ശാന്തമായിരിക്കുമെന്ന് കാലാവസ്ഥാ കേന്ദ്രം അറിയിച്ചു.