48
അബുദാബി : ഉയർന്ന താപനില കാരണം വാഹനാപകടങ്ങൾക്ക് കാരണമാകുന്ന ടയർ ബ്ലോഔട്ടുകൾ (Tyre Blowout) തടയുന്നതിനായി പരിശോധനകൾ കർശനമാക്കണമെന്ന് വാഹന ഉടമകളോട് ആവശ്യപ്പെട്ട് അബുദാബി പോലീസ്. ‘സേഫ് സമർ’, ‘സമ്മർ വിത്തൗട്ട് ആക്സിഡന്റ്സ്’ എന്നീ റോഡ് സുരക്ഷാ ബോധവൽക്കരണ പരിപാടികളുടെ ഭാഗമായാണ് നിർദ്ദേശം.
തേയ്മാനം സംഭവിച്ച ടയറുകൾ മാറ്റി സ്ഥാപിക്കാനും മാനദണ്ഡങ്ങൾ പാലിക്കുന്ന മികച്ച ടയറുകൾ മാത്രം ഉപയോഗിക്കാനും പോലീസ് മുന്നറിയിപ്പ് നൽകി. നിർദ്ദിഷ്ട അളവിൽ എയർ പ്രഷർ നിലനിർത്തുന്നത് ചൂടുകാലത്ത് ടയറുകൾ പൊട്ടിത്തെറിക്കുന്നത് തടയാൻ സഹായിക്കും. ബോധവൽക്കരണത്തിന്റെ ഭാഗമായി അൽ ഫുത്തൈം ഗ്രൂപ്പ്, മിഷെലിൻ തുടങ്ങിയ പ്രമുഖ ഏജൻസികളുമായി സഹകരിച്ച് റോഡുകളിൽ ഡ്രൈവർമാർക്കായി സൗജന്യ ടയർ സുരക്ഷാ പരിശോധനകളും പോലീസ് സംഘടിപ്പിക്കുന്നുണ്ട്.