ദുബായ് : നഗരത്തിലൂടെ സ്വതന്ത്രമായി നടക്കാനും സൈക്കിളിലോ ഇ-സ്കൂട്ടറിലോ കറങ്ങാനും ആഗ്രഹിക്കുന്നവർക്ക് യുഎഇയിൽ നിന്ന് ഇതാ ഒരു പുത്തൻ യാത്രാ വിപ്ലവം. ദുബായ് മരീന മുതൽ റിഗ്ഗ വരെയുള്ള 25 റെസിഡൻഷ്യൽ മേഖലകളെ അത്യാധുനിക കാൽനട-സൈക്കിൾ പാതകൾ വഴി പരസ്പരം കോർത്തിണക്കുന്ന അഞ്ചു വർഷത്തെ ബൃഹത്തായ മാസ്റ്റർ പ്ലാനിനാണ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) പച്ചക്കൊടി വീശിയത്. മെട്രോ, ബസ് സ്റ്റേഷനുകളിലേക്ക് എത്തുന്ന യാത്രക്കാരുടെ ആദ്യ-അവസാന ഘട്ട യാത്രകൾ (First and Last-Mile Journey) കൂടുതൽ സുരക്ഷിതവും എളുപ്പവുമാക്കുകയാണ് ഈ മാതൃകാ പദ്ധതിയുടെ പ്രധാന ലക്ഷ്യം.
2030-ഓടെ ദുബായിലെ 63 പൊതുഗതാഗത സ്റ്റേഷനുകളുടെ പരിസര പ്രദേശങ്ങൾ വീതിയേറിയ നടപ്പാതകൾ, അത്യാധുനിക സൈക്കിൾ ട്രാക്കുകൾ, വെയിലിനെ പ്രതിരോധിക്കുന്ന തണൽ വഴികൾ, സുരക്ഷിതമായ ക്രോസിംഗുകൾ എന്നിവയോടെ ആഗോള നിലവാരത്തിലേക്ക് മാറും. നിലവിൽ ദുബായ് മരീന, നായിഫ്, അൽ റിഗ്ഗ, അൽ മുറാർ, അൽ മുറഖബാത് എന്നിവിടങ്ങളിൽ പദ്ധതിയുടെ നിർമാണ പ്രവൃത്തികൾ അതിവേഗം പുരോഗമിക്കുകയാണ്. കഴിഞ്ഞ 2025-ൽ മാത്രം ദുബായിൽ 342 ദശലക്ഷം കാൽനട യാത്രകളും 57.3 ദശലക്ഷം സൈക്കിൾ യാത്രകളും 39.6 ദശലക്ഷം ഇ-സ്കൂട്ടർ ട്രിപ്പുകളും രേഖപ്പെടുത്തിയത് ജനങ്ങൾക്ക് ഇത്തരം ബദൽ മാർഗ്ഗങ്ങളോടുള്ള പ്രിയം തെളിയിക്കുന്നു. പദ്ധതി പൂർത്തിയാകുന്നതോടെ സ്വകാര്യ കാറുകളുടെ ഉപയോഗം കുറയ്ക്കാനും, നഗരത്തിലെ പൊതുഗതാഗത ശൃംഖലയെ കൂടുതൽ ജനകീയമാക്കാനും സാധിക്കുമെന്നാണ് ആർടിഎ വ്യക്തമാക്കുന്നത്.