22
അബുദാബി: യുഎഇയിൽ വരും മാസങ്ങളിൽ ‘എൽ നിന്യോ’ (El Niño) കാലാവസ്ഥാ പ്രതിഭാസം തുടരാൻ 99 ശതമാനം സാധ്യതയെന്ന് നാഷണൽ സെന്റർ ഓഫ് മീറ്റിയോറോളജിയുടെ (NCM) പ്രവചനം. 2026 ആഗസ്റ്റ് മുതൽ ഡിസംബർ വരെയുള്ള കാലയളവിൽ രാജ്യത്ത് താപനിലയും മഴയും സാധാരണ നിലയേക്കാൾ ഉയരാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രത്തിന്റെ ഏറ്റവും പുതിയ റിപ്പോർട്ടിൽ പറയുന്നു.
പസഫിക് സമുദ്രത്തിലെ താപനിലയിലുണ്ടാകുന്ന വ്യതിയാനങ്ങൾ ആഗോള കാലാവസ്ഥയെ ബാധിക്കുന്ന പ്രതിഭാസമാണ് എൽ നിന്യോ. നിലവിൽ പസഫിക് സമുദ്രത്തിന്റെ മധ്യ-കിഴക്കൻ മേഖലകളിൽ സമുദ്രോപരിതല താപനില ശരാശരിയേക്കാൾ ഉയർന്ന നിലയിലാണ്. ഇതിന്റെ സ്വാധീനം മൂലം ആഗസ്റ്റ് മുതൽ ഡിസംബർ വരെയുള്ള മാസങ്ങളിൽ, പ്രത്യേകിച്ച് വർഷാവസാനത്തോടെ യുഎഇയിൽ താപനിലയിലും മഴയുടെ അളവിലും പ്രകടമായ മാറ്റങ്ങൾ ഉണ്ടായേക്കാമെന്നാണ് സൂചന.