ഭക്ഷണത്തിലെ പിഴവുകൾ നിങ്ങളുടെ ജോലിയെ ബാധിക്കാം; മുന്നറിയിപ്പുമായി വിദഗ്ദ്ധർ

ദുബായ് : ജോലിസ്ഥലത്തുണ്ടാകുന്ന അമിത ക്ഷീണം, ശ്രദ്ധക്കുറവ്, പെട്ടെന്നുള്ള ദേഷ്യം എന്നിവയ്ക്ക് കാരണം നിങ്ങളുടെ ഭക്ഷണരീതിയിലെ പിഴവുകളാകാമെന്ന് ദുബായിലെ ന്യൂട്രീഷൻ വിദഗ്ദ്ധയായ ഹന്ന ലൂസി മർഫി വ്യക്തമാക്കുന്നു. ശരീരത്തിലുണ്ടാകുന്ന ചെറിയ നിർജ്ജലീകരണം പോലും മസ്തിഷ്കത്തിന്റെ പ്രവർത്തനത്തെയും തീരുമാനങ്ങളെടുക്കാനുള്ള ശേഷിയെയും ബാധിക്കും. പലപ്പോഴും ദാഹത്തെ വിശപ്പായി തെറ്റിദ്ധരിച്ച് അനാവശ്യമായി ലഘുഭക്ഷണങ്ങൾ കഴിക്കുന്നത് ഒഴിവാക്കണം. പ്രഭാതഭക്ഷണം ഒഴിവാക്കി വെറുംവയറ്റിൽ കാപ്പി കുടിക്കുന്നത് രക്തത്തിലെ ഗ്ലൂക്കോസ് നില ഉയർത്തും. ജോലിയിൽ മികച്ച ഉൽപ്പാദനക്ഷമത നിലനിർത്താൻ പ്രഭാതഭക്ഷണത്തിൽ പ്രോട്ടീൻ ഉൾപ്പെടുത്താനും കൃത്യമായ സമയത്ത് വെള്ളം കുടിക്കാനും ഭക്ഷണകാര്യങ്ങളിൽ മുൻകൂട്ടി പ്ലാനിങ് ഉണ്ടാക്കാനും അവർ നിർദ്ദേശിക്കുന്നു.