യുഎഇയിൽ റെക്കോർഡ് ചരിത്രമെഴുതി ആദ്യ പാസഞ്ചർ ട്രെയിൻ അബുദാബിയിലെത്തി

അബുദാബി : യുഎഇയുടെ ഗതാഗത ചരിത്രത്തിൽ പുതിയ അധ്യായം കുറിച്ച് രാജ്യത്തെ ആദ്യത്തെ പാസഞ്ചർ ട്രെയിൻ (Etihad Rail) സർവീസ് വിജയകരമായി അബുദാബിയിലെത്തി. ഫുജൈറയിൽ നിന്ന് ഇന്ന് പുലർച്ചെ 5:34-ന് പുറപ്പെട്ട ഉദ്ഘാടന ട്രെയിൻ സർവീസ്, കൃത്യം 1 മണിക്കൂർ 45 മിനിറ്റ് യാത്രയ്ക്ക് ശേഷം രാവിലെ 7:19-ഓടെ അബുദാബി മുഹമ്മദ് ബിൻ സായിദ് സിറ്റി സ്റ്റേഷനിൽ എത്തിച്ചേർന്നു.
ആദ്യ യാത്രക്കാരെ സ്വീകരിക്കാൻ പരമ്പരാഗത എമിറാത്തി നൃത്ത രൂപങ്ങളോടെ വൻ ജനക്കൂട്ടമാണ് സ്റ്റേഷനിൽ തടിച്ചുകൂടിയത്. ഷാർജ, ദുബായ് വഴിയാണ് ട്രെയിൻ അബുദാബിയിൽ എത്തിയത്. യാത്ര അതീവ സുഗമവും ആസ്വാദ്യകരവുമായിരുന്നുവെന്ന് ആദ്യ സർവീസിന്റെ ഭാഗമായ കുടുംബങ്ങൾ പ്രതികരിച്ചു. സ്റ്റേഷനുകളിലേക്ക് യാത്രക്കാർക്ക് എളുപ്പത്തിൽ എത്തിച്ചേരാൻ ഷട്ടിൽ ബസുകൾ, ടാക്സികൾ, ഇ-ഹെയ്‌ലിങ് സേവനങ്ങൾ എന്നിവ ആർടിഎയുമായി സഹകരിച്ച് എത്തിഹാദ് റെയിൽ ഒരുക്കിയിട്ടുണ്ട്. വരാനിരിക്കുന്ന ദുബായ് സ്റ്റേഷൻ സെപ്റ്റംബറോടെ തുറക്കുന്നതോടെ ഇത് ദുബായ് മെട്രോയുമായി നേരിട്ട് ബന്ധിപ്പിക്കും.