അത്യാധുനിക ഫയർ ട്രക്കുകൾ സ്വന്തമാക്കി ഷാർജ സിവിൽ ഡിഫൻസ്

ഷാർജ : വ്യവസായ മേഖലകളിലെയും മറ്റ് അടിയന്തിര സാഹചര്യങ്ങളിലെയും വൻ തീപിടുത്തങ്ങൾ അതിവേഗം നേരിടുന്നതിനായി അത്യാധുനിക സാങ്കേതികവിദ്യകളോടു കൂടിയ പുതിയ ഫയർ ട്രക്കുകൾ ഷാർജ സിവിൽ ഡിഫൻസ് തങ്ങളുടെ സേനയുടെ ഭാഗമാക്കി. പരിസ്ഥിതി സൗഹൃദ എൻജിനുകളുള്ള ‘IVECO T-WAY 480’ മോഡൽ വാഹനങ്ങളാണ് പുതുതായി നിരത്തിലിറക്കിയത്. കഠിനമായ ഭൂപ്രകൃതിയിലും ഓഫ്-റോഡുകളിലും സുഗമമായി സഞ്ചരിക്കാൻ കഴിയുന്ന ഈ ട്രക്കുകളിൽ 16,000 ലിറ്റർ ശേഷിയുള്ള വാട്ടർ ടാങ്കും മിനിറ്റിൽ 2,500 ലിറ്റർ വെള്ളം പമ്പ് ചെയ്യാവുന്ന അത്യാധുനിക പമ്പുമുണ്ട്. കൂടാതെ, 90 മീറ്റർ അകലേക്ക് വരെ വെള്ളം ചീറ്റാൻ ശേഷിയുള്ള റിമോട്ട് കൺട്രോൾ വാട്ടർ മോണിറ്ററും പെട്രോളിയം തീപിടുത്തങ്ങൾ അണയ്ക്കാനുള്ള പ്രത്യേക ഫോം സിസ്റ്റവും ഇതിന്റെ സവിശേഷതകളാണ്. പുതിയ ട്രക്കുകൾ എത്തുന്നതോടെ അപകടങ്ങളോടുള്ള പ്രതികരണ സമയം ഗണ്യമായി കുറയ്ക്കാൻ സാധിക്കുമെന്ന് സിവിൽ ഡിഫൻസ് ഡയറക്ടർ ജനറൽ മേജർ ജനറൽ യൂസഫ് ഉബൈദ് ഹർമൂൽ അൽ ഷംസി വ്യക്തമാക്കി.