റിയാദ് : ഹോർമുസ് കടലിടുക്കിൽ കുടുങ്ങിക്കിടക്കുന്ന പതിനൊന്നായിരത്തിലധികം കപ്പൽ ജീവനക്കാരെ സുരക്ഷിതമായി ഒഴിപ്പിക്കുന്നതിനായി താൽക്കാലിക സമുദ്ര ഇടനാഴി ഒരുക്കാനുള്ള ഒമാന്റെ തീരുമാനത്തെ ഗൾഫ് സഹകരണ കൗൺസിൽ (GCC) സ്വാഗതം ചെയ്തു. അന്താരാഷ്ട്ര മാരിടൈം ഓർഗനൈസേഷനുമായി (IMO) സഹകരിച്ച് ഒമാൻ പ്രഖ്യാപിച്ച ഈ സുപ്രധാന നീക്കത്തെ ജിസിസി സെക്രട്ടറി ജനറൽ ജാസിം മുഹമ്മദ് അൽബുദൈവി പ്രശംസിച്ചു. അന്താരാഷ്ട്ര നിയമങ്ങൾക്കും കടൽ നിയമങ്ങൾക്കും വിധേയമായി കപ്പലുകളുടെ സുരക്ഷിതവും തടസ്സമില്ലാത്തതുമായ സഞ്ചാരം ഉറപ്പാക്കാൻ ഈ താൽക്കാലിക പാത സഹായിക്കും.
മേഖലയിലെ സുരക്ഷയും സ്ഥിരതയും വർദ്ധിപ്പിക്കുന്നതിനും ആഗോള വ്യാപാര ശൃംഖല സുഗമമാക്കുന്നതിനും ഒമാൻ സ്വീകരിക്കുന്ന വിവേകപൂർണ്ണമായ സമീപനത്തിന്റെ തെളിവാണ് ഈ നടപടിയെന്ന് സെക്രട്ടറി ജനറൽ വ്യക്തമാക്കി. അതേസമയം, ഒമാന്റെ ഈ സുപ്രധാന തീരുമാനത്തിന് പിന്നാലെ ഹോർമുസ് കടലിടുക്കിലെ കപ്പൽ സ്വാതന്ത്ര്യത്തിന്മേൽ ഇറാൻ ഉയർത്തുന്ന ഭീഷണികളെയും അവകാശവാദങ്ങളെയും ജിസിസി ശക്തമായ ഭാഷയിൽ അപലപിച്ചു. സമുദ്ര സുരക്ഷ ഉറപ്പാക്കാനും മേഖലയിലെ സംഘർഷങ്ങൾ ലഘൂകരിക്കാനുമുള്ള അന്താരാഷ്ട്ര ശ്രമങ്ങൾക്ക് ജിസിസി രാജ്യങ്ങളുടെ പൂർണ്ണ പിന്തുണ അദ്ദേഹം ഉറപ്പുനൽകി.
22