അബുദാബി : യുഎഇയിലെ ഇന്ത്യൻ പ്രവാസികളുടെ പാസ്‌പോർട്ട്, വിസ, കോൺസുലാർ സേവനങ്ങൾക്കായുള്ള ഔട്ട്‌സോഴ്‌സിങ് കരാർ മലയാളി പങ്കാളിത്തമുള്ള പ്രമുഖ ട്രാവൽ ഗ്രൂപ്പായ അൽഹിന്ദ് (Alhind Tours and Travels) സ്വന്തമാക്കി. ഇതുവരെ ഈ സേവനങ്ങൾ നൽകിയിരുന്ന ബിഎൽഎസ് ഇന്റർനാഷണൽ (BLS International), എസ്ജിഐവിഎസ് ഗ്ലോബൽ (SGIVS Global) എന്നീ കമ്പനികളുടെ കാലാവധി 2026 ജൂൺ 30-ഓടെ അവസാനിക്കും. **2026 ജൂലൈ 1 മുതൽ** സമർപ്പിക്കുന്ന എല്ലാ അപേക്ഷകളും അൽഹിന്ദിന്റെ പുതിയ കേന്ദ്രങ്ങൾ വഴിയായിരിക്കും കൈകാര്യം ചെയ്യുകയെന്ന് അബുദാബിയിലെ ഇന്ത്യൻ എംബസി അറിയിച്ചു.
യുഎഇയിലെ ഏഴ് എമിറേറ്റുകളിലുമായി ആകെ 16 പുതിയ സേവന കേന്ദ്രങ്ങളാണ്. അൽഹിന്ദ് ആരംഭിക്കുന്നത്. അൽഹിന്ദ് യുഎഇ ഓപ്പറേഷൻസ് മാനേജർ അരുൺ രാധാകൃഷ്ണൻ വ്യക്തമാക്കിയതനുസരിച്ച് പുതിയ കേന്ദ്രങ്ങൾ താഴെ പറയുന്ന സ്ഥലങ്ങളിലായിരിക്കും:
* അബുദാബി (6 കേന്ദ്രങ്ങൾ) : അൽ ഖാലിദിയ, അൽ റീം ഐലൻഡ്, മുസഫ, മദീനത്ത് സായിദ്, ഗയാത്തി, അൽ ഐൻ.
* ദുബായ് (2 കേന്ദ്രങ്ങൾ ): ബർ ദുബായ്, ദുബായ് ഇൻവെസ്റ്റ്‌മെന്റ് പാർക്ക് (DIP).
* ഷാർജ (2 കേന്ദ്രങ്ങൾ) : അൽ മജാസ്, റോള.
* മറ്റ് എമിറേറ്റുകൾ : അജ്മാൻ (അൽ ജർഫ്), ഫുജൈറ, ഉമ്മുൽ ഖുവൈൻ, ഖോർഫക്കാൻ (കോർണിഷ്), കൽബ, റാസൽഖൈമ.ജൂൺ 30 വരെ നിലവിലുള്ള ബിഎൽഎസ് കേന്ദ്രങ്ങൾ വഴി തന്നെ സേവനങ്ങൾ തുടരും. പുതിയ കേന്ദ്രങ്ങളുടെ പ്രവർത്തന സമയം, ഫീസ് നിരക്കുകൾ, അപ്പോയിന്റ്മെന്റ് രീതികൾ എന്നിവ സംബന്ധിച്ച വിശദവിവരങ്ങൾ ഇന്ത്യൻ എംബസിയും ദുബായ് കോൺസുലേറ്റും ഉടൻ തന്നെ ഔദ്യോഗികമായി പുറത്തുവിടും. വ്യാജ വാർത്തകളിൽ വഞ്ചിതരാകരുതെന്നും ഔദ്യോഗിക അറിയിപ്പുകൾ മാത്രം പിന്തുടരണമെന്നും എംബസി പ്രവാസികളോട് അഭ്യർത്ഥിച്ചു.