അബുദാബി : യുഎഇ തലസ്ഥാനത്തെ വാടകക്കാർക്ക് വലിയ ആശ്വാസമേകി പുതിയ റിയൽ എസ്റ്റേറ്റ് നിർദ്ദേശം. അബുദാബിയിലെ റിയൽ എസ്റ്റേറ്റ് മേഖലയെ നിയന്ത്രിക്കുന്ന ഔദ്യോഗിക അതോറിറ്റിയായ അബുദാബി റിയൽ എസ്റ്റേറ്റ് സെന്റർ (ADREC), പുതിയ ഉത്തരവ് ഉണ്ടാകുന്നത് വരെ വാടക കരാറുകളിൽ യാതൊരുവിധ വാടക വർദ്ധനവും പാടില്ലെന്ന് പ്രഖ്യാപിച്ചു. വിപണിയിലെ സ്ഥിരത നിലനിർത്താനും പെട്ടെന്നുണ്ടാകുന്ന വാടക വർദ്ധനവിൽ നിന്ന് വാടകക്കാരെ സംരക്ഷിക്കാനും ലക്ഷ്യമിട്ടാണ് ഈ സുപ്രധാന തീരുമാനം.
പുതിയ കരാറുകൾക്കും നിലവിലുള്ള കരാറുകൾ പുതുക്കുന്നതിനും (Renewals) ഈ വാടക നിയന്ത്രണം ബാധകമായിരിക്കുമെന്ന് എഡിആർഇസി കസ്റ്റമർ സപ്പോർട്ട് വിഭാഗം വ്യക്തമാക്കി. ഇതനുസരിച്ച്, മുൻ കരാറിൽ രേഖപ്പെടുത്തിയിട്ടുള്ള അതേ വാടക തുകയിൽ തന്നെയായിരിക്കണം നിലവിലെ കരാറുകളും മുന്നോട്ട് കൊണ്ടുപോകേണ്ടത്. അബുദാബിയിലെ റിയൽ എസ്റ്റേറ്റ് മേഖലയിൽ തദ്ദേശീയ-വിദേശ നിക്ഷേപങ്ങളും താമസക്കാരുടെ എണ്ണവും വർദ്ധിച്ചുവരുന്ന സാഹചര്യത്തിലാണ് ഭൂവുടമകളും വാടകക്കാരും തമ്മിലുള്ള ബന്ധം കൂടുതൽ സുതാര്യമാക്കാൻ അതോറിറ്റി ഈ ഇടപെടൽ നടത്തിയിരിക്കുന്നത്. വാടക തുക മരവിപ്പിച്ചത് കുടുംബങ്ങൾക്കും ബിസിനസ്സ് സ്ഥാപനങ്ങൾക്കും വലിയ സാമ്പത്തിക സുരക്ഷിതത്വം നൽകുമെന്നും ജീവിതച്ചെലവ് മൂലമുണ്ടാകുന്ന പണപ്പെരുപ്പം നിയന്ത്രിക്കാൻ ഇത് സഹായിക്കുമെന്നും സാമ്പത്തിക വിദഗ്ദ്ധർ വിലയിരുത്തുന്നു.
28