എയുഎസ് പ്രസ്സ്’ ഉദ്ഘാടനം ചെയ്ത് ശൈഖ ബോദൂർ

ഷാർജ : വിജ്ഞാന വ്യാപനവും സാംസ്കാരിക കൈമാറ്റവും ലക്ഷ്യമിട്ട് അമേരിക്കൻ യൂണിവേഴ്സിറ്റി ഓഫ് ഷാർജയുടെ (AUS) പുതിയ പബ്ലിഷിംഗ് വിഭാഗമായ ‘എയുഎസ് പ്രസ്സ്’ (AUS Press) യുണിവേഴ്സിറ്റി പ്രസിഡന്റ് ശൈഖ ബോദൂർ ബിൻത് സുൽത്താൻ അൽ ഖാസിമി ഉദ്ഘാടനം ചെയ്തു. ഷാർജ അതിഥി നഗരമായി പങ്കെടുക്കുന്ന പോളണ്ടിലെ വാർസോ അന്താരാഷ്ട്ര പുസ്തകമേളയിൽ വെച്ചായിരുന്നു പ്രകാശനം. ഉന്നത നിലവാരത്തിലുള്ള എഡിറ്റോറിയൽ മാനദണ്ഡങ്ങൾ മുൻനിർത്തി പ്രാദേശികവും അന്തർദ്ദേശീയവുമായ പ്രാധാന്യമുള്ള വൈജ്ഞാനിക സൃഷ്ടികളും വിവർത്തനങ്ങളും പ്രസിദ്ധീകരിക്കാനാണ് എയുഎസ് പ്രസ്സ് ലക്ഷ്യമിടുന്നത്. സർവ്വകലാശാലകൾ വിജ്ഞാനം ഉത്പാദിപ്പിക്കുന്നതുപോലെ തന്നെ അത് സമൂഹത്തിൽ പങ്കുവെക്കാനും വിവർത്തനം ചെയ്യാനും ഒപ്പം വിവിധ സംസ്കാരങ്ങൾ തമ്മിലുള്ള ചർച്ചകളുടെ ഭാഗമാക്കാനും തുല്യ പ്രാധാന്യം നൽകണമെന്ന ബോധ്യത്തിലാണ് എയുഎസ് പ്രസ്സ് ആരംഭിക്കുന്നതെന്ന് ശൈഖ ബോദൂർ വ്യക്തമാക്കി. യുഎഇയിൽ നിന്നും പോളണ്ടിൽ നിന്നുമുള്ള പ്രസാധകർ, എഴുത്തുകാർ, അക്കാദമിക് വിദഗ്ധർ, കലാകാരന്മാർ എന്നിവരെ ഒന്നിപ്പിച്ചുകൊണ്ട് സാഹിത്യത്തിലൂടെയും കലയിലൂടെയും ബൗദ്ധിക സംവാദങ്ങളിലൂടെയും ഷാർജയുടെ സാംസ്കാരിക കാഴ്ചപ്പാട് ഉയർത്തിക്കാട്ടുന്ന വിപുലമായ പരിപാടികളാണ് വാർസോ പുസ്തകമേളയിൽ ഷാർജ ഒരുക്കിയിരിക്കുന്നത്.