റിയാദ് : ലോകത്തിലെ ഏറ്റവും വലിയ കണ്ടെയ്നർ ഷിപ്പിംഗ് കമ്പനിയായ എംഎസ്‌സി (MSC), ഹോർമുസ് കടലിടുക്ക് ഒഴിവാക്കിക്കൊണ്ട് യൂറോപ്പിനെ മിഡിൽ ഈസ്റ്റുമായി ബന്ധിപ്പിക്കുന്ന പുതിയ ചരക്ക് പാത ആരംഭിച്ചു. സൗദി അറേബ്യയെ പ്രധാന കേന്ദ്രമാക്കിയാണ് ഈ പുതിയ സർവീസ് വിഭാവനം ചെയ്തിരിക്കുന്നത്. കടൽമാർഗ്ഗവും കരമാർഗ്ഗവും സംയോജിപ്പിച്ചുകൊണ്ടുള്ളതാണ് ഈ ചരക്ക് നീക്കം.
യൂറോപ്പിൽ നിന്നുള്ള കൂറ്റൻ കപ്പലുകൾ ചെങ്കടൽ തീരത്തെ ജിദ്ദ ഇസ്‌ലാമിക് പോർട്ടിലും റാബിഗിലെ കിംഗ് അബ്ദുള്ള പോർട്ടിലുമാണ് ആദ്യം എത്തുക. ഇവിടെ ഇറക്കുന്ന ചരക്കുകൾ കരമാർഗ്ഗം (ട്രക്കുകളിലും ട്രെയിനുകളിലും) ദമ്മാമിലെ കിംഗ് അബ്ദുൽ അസീസ് പോർട്ടിലേക്ക് കൊണ്ടുപോകും. അവിടെ നിന്ന് ചെറിയ കപ്പലുകൾ (Feeder vessels) വഴി അറേബ്യൻ ഗൾഫിലെ മറ്റ് തുറമുഖങ്ങളിലേക്ക് ചരക്കുകൾ എത്തിക്കും. സൗദി പ്രസ് ഏജൻസിയാണ് (SPA) ഇക്കാര്യം റിപ്പോർട്ട് ചെയ്തത്.
ജിദ്ദ ഇസ്‌ലാമിക് പോർട്ടിനെ ഗഡാൻസ്ക്, ബ്രെമർഹാവൻ, ആന്റ്‌വെർപ്, വലെൻസിയ, ബാഴ്‌സലോണ, ജിയോയ ടൗറോ തുടങ്ങിയ പ്രമുഖ ആഗോള തുറമുഖങ്ങളുമായി ഈ പാത ബന്ധിപ്പിക്കുന്നു. 16,000 കണ്ടെയ്നറുകൾ വരെ വഹിക്കാൻ ശേഷിയുള്ള കപ്പലുകളാണ് ഈ സർവീസിനായി ഉപയോഗിക്കുന്നത്. സൗദിയെ മൂന്ന് ഭൂഖണ്ഡങ്ങളെ ബന്ധിപ്പിക്കുന്ന ആഗോള ലോജിസ്റ്റിക് ഹബ്ബാക്കി മാറ്റാനുള്ള ‘നാഷണൽ ട്രാൻസ്‌പോർട്ട് ആൻഡ് ലോജിസ്റ്റിക് സ്ട്രാറ്റജി’യുടെ ഭാഗമാണ് ഈ നീക്കം. ഇത് പ്രാദേശിക വിപണികളുമായുള്ള ബന്ധം ശക്തമാക്കാനും വിതരണ ശൃംഖല കൂടുതൽ സുഗമമാക്കാനും സഹായിക്കുമെന്ന് അധികൃതർ വ്യക്തമാക്കി.