ദുബായ് : യുഎഇയിൽ നാല് വയസ്സുവരെയുള്ള കുട്ടികൾക്ക് കാർ സീറ്റ് നിർബന്ധമാക്കിയിട്ട് അഞ്ച് വർഷം തികയുമ്പോഴും, ഇപ്പോഴും 28 ശതമാനം മാതാപിതാക്കൾ കുട്ടികൾക്കായി കാർ സീറ്റ് വാങ്ങിയിട്ടില്ലെന്ന് പുതിയ സർവേ റിപ്പോർട്ട് വ്യക്തമാക്കുന്നു. അപകടങ്ങളിൽ മരണം സംഭവിക്കാനുള്ള സാധ്യത 71 ശതമാനവും പരിക്കേൽക്കാനുള്ള സാധ്യത 82 ശതമാനവും കുറയ്ക്കാൻ ചൈൽഡ് കാർ സീറ്റുകൾക്ക് കഴിയുമെന്നിരിക്കെയാണ് ഈ അനാസ്ഥ. റോഡ് സേഫ്റ്റി യുഎഇ , അൽ വത്ബ ഇൻഷുറൻസ് എന്നിവർ ചേർന്ന് 2026 ജനുവരിയിൽ 1,010 താമസക്കാർക്കിടയിൽ നടത്തിയ പഠനത്തിലാണ് ഈ വിവരങ്ങളുള്ളത്. അപകടസമയത്ത് ഇത്തരം സീറ്റുകൾ മികച്ച സംരക്ഷണം നൽകുമെന്ന് 95 ശതമാനം മാതാപിതാക്കളും സമ്മതിക്കുന്നുണ്ടെങ്കിലും, പ്രായോഗികമായി ഇത് നടപ്പിലാക്കുന്നതിൽ വലിയ കുറവുണ്ട്.
നാല് വയസ്സിൽ താഴെ പ്രായമുള്ള കുട്ടികളുള്ള മാതാപിതാക്കളിൽ 72 ശതമാനം പേർക്ക് മാത്രമാണ് സ്വന്തമായി ചൈൽഡ് സീറ്റുകൾ ഉള്ളത്. ഇതിൽ തന്നെ 79 ശതമാനം പേർ മാത്രമാണ് യാത്രകളിൽ ഇത് കൃത്യമായി ഉപയോഗിക്കുന്നത്. കുട്ടികൾക്കായി കാർ സീറ്റ് വാങ്ങാത്തവർ അതിന് പറയുന്ന പ്രധാന കാരണം “തങ്ങളുടെ മക്കൾക്ക് സീറ്റ് ബെൽറ്റ് ധരിക്കുന്നത് ഇഷ്ടമല്ല” എന്നതാണ്. 29 ശതമാനം മാതാപിതാക്കളാണ് ഈ കാരണം ഉന്നയിക്കുന്നത്. ഇതിനുപുറമെ, കുട്ടികളെ കൈകളിൽ പിടിക്കുന്നത് കാർ സീറ്റിലിരുത്തുന്നതുപോലെ സുരക്ഷിതമാണെന്ന് 24 ശതമാനം പേരും, തങ്ങൾ സുരക്ഷിതമായി വണ്ടിയോടിക്കുന്നവരായതിനാൽ അപകടം സംഭവിക്കില്ലെന്ന് 23 ശതമാനം പേരും വിശ്വസിക്കുന്നു.
കാർ സീറ്റ് ഉണ്ടായിട്ടും അത് എപ്പോഴും ഉപയോഗിക്കാത്തവരും സമാനമായ ന്യായങ്ങളാണ് നിരത്തുന്നത്. തങ്ങൾ മികച്ച രീതിയിൽ വണ്ടിയോടിക്കുന്നവരാണെന്ന് 43 ശതമാനം പേരും, കുട്ടികൾക്ക് സീറ്റിലിരിക്കാൻ താല്പര്യമില്ലെന്ന് 37 ശതമാനം പേരും പറയുന്നു. കൂടാതെ ചെറിയ യാത്രകൾക്ക് സീറ്റ് ബെൽറ്റിന്റെ ആവശ്യമില്ലെന്ന തെറ്റായ ധാരണയും ഇവർക്കുണ്ട്. കാർ സീറ്റുകളുടെ പ്രാധാന്യത്തെക്കുറിച്ച് മാതാപിതാക്കളെ ബോധവൽക്കരിക്കേണ്ടത് അത്യാവശ്യമാണെന്ന് റോഡ് സേഫ്റ്റി യുഎഇ മാനേജിംഗ് ഡയറക്ടർ തോമസ് എഡൽമാൻ പറഞ്ഞു. ആശുപത്രികളിൽ പ്രസവസമയത്ത് തന്നെ ഇത് സംബന്ധിച്ച കർശന നിർദ്ദേശങ്ങൾ നൽകണമെന്നും, വിദേശ രാജ്യങ്ങളിലേതുപോലെ കുഞ്ഞിനെ ഡിസ്ചാർജ് ചെയ്യുമ്പോൾ കാറിൽ സുരക്ഷാ സീറ്റ് ഉണ്ടെന്ന് ഉറപ്പുവരുത്തുന്ന നയം നടപ്പിലാക്കണമെന്നും അദ്ദേഹം നിർദ്ദേശിച്ചു. സ്കൂൾ തലങ്ങളിലും ഇത്തരം ബോധവൽക്കരണ പ്രവർത്തനങ്ങൾ തുടരണമെന്നും അദ്ദേഹം കൂട്ടിച്ചേർത്തു.