യുഎഇയിൽ ഇത്തവണ ചൂടേറിയ പെരുന്നാൾക്കാലം; രാത്രികളിൽ കടുത്ത ഹുമിഡിറ്റിക്ക് സാധ്യതയെന്ന് മുന്നറിയിപ്പ്

യുഎഇ : ബലിപെരുന്നാൾ ദിനങ്ങളിൽ രാജ്യത്ത് ചൂടും അന്തരീക്ഷ ആർദ്രതയും (ഹുമിഡിറ്റി) വർദ്ധിക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ (NCM) മുന്നറിയിപ്പ്. ഞായറാഴ്ച താപനിലയിൽ നേരിയ കുറവുണ്ടാകുമെങ്കിലും തിങ്കളാഴ്ച മുതൽ ചൂട് വീണ്ടും കടുക്കും. പെരുന്നാൾ അവധി ദിവസങ്ങളിൽ അൽ ഐനിൽ താപനില 43 ഡിഗ്രി സെൽഷ്യസ് വരെയും ഫുജൈറയിൽ 41 ഡിഗ്രി സെൽഷ്യസ് വരെയും ഉയർന്നേക്കാം. അറഫാ ദിനമായ ചൊവ്വാഴ്ചയും പെരുന്നാൾ ദിനങ്ങളിലും ആകാശം പൊതുവെ തെളിഞ്ഞതോ ഭാഗികമായി മേഘാവൃതമോ ആയിരിക്കും. ഇതോടൊപ്പം രാത്രികാലങ്ങളിലും പുലർച്ചെയും തീരദേശ-പടിഞ്ഞാറൻ മേഖലകളിൽ മൂടൽമഞ്ഞിനും സാധ്യതയുണ്ട്. വരും ദിവസങ്ങളിൽ മണിക്കൂറിൽ 35 കിലോമീറ്റർ വേഗതയിൽ വരെ കാറ്റടിക്കാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്നും കാലാവസ്ഥാ കേന്ദ്രം അറിയിച്ചു.