യുഎഇയിൽ സുഗന്ധക്കൂട്ടുകളും ഫാഷൻ ട്രെൻഡുകളുമായി പെരുന്നാൾക്കാലം

യുഎഇ : ബലിപെരുന്നാൾ ആഘോഷങ്ങൾക്കായി പ്രവാസി ലോകവും സ്വദേശികളും ഒരുങ്ങിക്കഴിഞ്ഞു. പുലർച്ചെയുള്ള ഈദ് നമസ്കാരത്തിനായുള്ള ശാന്തതയും പുതുവസ്ത്രങ്ങൾ ധരിക്കാനുള്ള ആവേശവും വീടുകളിൽ പടരുന്ന ബഖൂറിന്റെ സുഗന്ധവുമെല്ലാം പെരുന്നാൾ ദിനങ്ങളെ സവിശേഷമാക്കുന്നു. പെരുന്നാൾ നമസ്കാരത്തിന് പോകുമ്പോഴും കുടുംബവീടുകൾ സന്ദർശിക്കുമ്പോഴും എങ്ങനെ മികച്ച ലുക്കിൽ തിളങ്ങാമെന്ന് വ്യക്തമാക്കുകയാണ് യുഎഇയിലെ പ്രമുഖ ഫാഷൻ, പെർഫ്യൂം വിദഗ്ധർ. പെരുന്നാൾ ദിനങ്ങളിൽ പലവിധ ഒത്തുചേരലുകൾ ഉള്ളതിനാൽ ദീർഘനേരം നിലനിൽക്കുന്നതും ആകർഷകവുമായ സുഗന്ധങ്ങൾക്കാണ് ജനങ്ങൾ മുൻഗണന നൽകുന്നതെന്ന് റസാസി ഗ്രൂപ്പ് സഹഉടമയും കനേസ സ്ഥാപകനുമായ അനീസ് അബ്ദുൽ റസാഖ് വ്യക്തമാക്കുന്നു. പരമ്പരാഗത അറബിക് സുഗന്ധങ്ങളായ ഔദ്, അംബർ, മസ്ക്, കുങ്കുമപ്പൂവ് (സാഫ്രോൺ) എന്നിവയുടെ കൂട്ടുകളാണ് പെരുന്നാൾ വിപണിയിൽ ഇപ്പോൾ തരംഗമായിരിക്കുന്നത്. വ്യത്യസ്ത സുഗന്ധങ്ങൾ ഒന്നിനു മീതെ മറ്റൊന്നായി ലെയർ ചെയ്ത് പുതിയൊരു സുഗന്ധക്കൂട്ട് സ്വന്തമായി നിർമ്മിക്കുന്ന രീതിയും ഇത്തവണത്തെ പെരുന്നാൾ ഒരുക്കങ്ങളിൽ സജീവമാണ്.