ബലിപെരുന്നാൾ അവധി; ദുബായ് ജിഡിആർഎഫ്എ പ്രവൃത്തി സമയം പ്രഖ്യാപിച്ചു

ദുബായ്: ബലിപെരുന്നാൾ അവധിക്കാലത്തെ ഔദ്യോഗിക പ്രവൃത്തി സമയവും സേവന ലഭ്യതാ വിവരങ്ങളും ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) പ്രഖ്യാപിച്ചു. മെയ് 25 തിങ്കളാഴ്ച രാവിലെ ആരംഭിക്കുന്ന പെരുന്നാൾ അവധി മെയ് 29 വെള്ളിയാഴ്ച വരെയാണ് നീണ്ടുനിൽക്കുന്നത്. അവധിക്കാലത്തും യാത്രക്കാർക്കും ഉപഭോക്താക്കൾക്കും തടസ്സമില്ലാത്ത സേവനം ഉറപ്പാക്കാൻ ദുബായ് അന്താരാഷ്ട്ര വിമാനത്താവളം ടെർമിനൽ 3-ലെ (അറൈവൽ ഹാൾ) കസ്റ്റമർ ഹാപ്പിനസ് സെന്റർ 24 മണിക്കൂറും ആഴ്ചയിൽ ഏഴു ദിവസവും പ്രവർത്തിക്കുമെന്ന് അധികൃതർ വ്യക്തമാക്കി. അൽ മനാര, അൽ തവാർ കസ്റ്റമർ ഹാപ്പിനസ് സെന്ററുകൾ തിങ്കൾ മുതൽ വെള്ളി വരെ രാവിലെ 9:00 മണി മുതൽ ഉച്ചയ്ക്ക് 1:00 മണി വരെയും അൽ അവിർ പബ്ലിക് സർവീസ് സെന്റർ വാരാന്ത്യ അവധി ദിവസങ്ങൾ ഉൾപ്പെടെ എല്ലാ ദിവസവും രാവിലെ 7:00 മണി മുതൽ രാത്രി 8:00 മണി വരെയും പ്രവർത്തിക്കും. ഇതിനുപുറമെ ജിഡിആർഎഫ്എ വെബ്‌സൈറ്റ്, ദുബായ് നൗ (Dubai Now) ആപ്പ് എന്നിവ വഴിയുള്ള ഡിജിറ്റൽ സേവനങ്ങളും 8005111 എന്ന നമ്പറിലുള്ള ആമർ കോൾ സെന്ററും അവധി ദിവസങ്ങളിലും 24 മണിക്കൂറും ലഭ്യമായിരിക്കുമെന്നും അധികൃതർ അറിയിച്ചു.