ഡ്രോണുകൾക്കും എയർ ടാക്സികൾക്കും പുതിയ നിയന്ത്രണങ്ങളുമായി യുഎഇ

ദുബായ്: വ്യോമഗതാഗത രംഗത്ത് വിപ്ലവകരമായ മാറ്റങ്ങൾ ലക്ഷ്യമിടുന്ന യുണൈറ്റഡ് അറബ് എമിറേറ്റ്സിൽ (UAE), പൈലറ്റില്ലാ വിമാനങ്ങളുടെയും (ഡ്രോണുകൾ) എയർക്രാഫ്റ്റുകളുടെയും റേഡിയോ സിസ്റ്റങ്ങളുമായി ബന്ധപ്പെട്ട പരിഷ്കരിച്ച നിയമങ്ങൾക്ക് ടെലികമ്മ്യൂണിക്കേഷൻസ് ആൻഡ് ഡിജിറ്റൽ റെഗുലേറ്ററി അതോറിറ്റി (TDRA) അംഗീകാരം നൽകി. രാജ്യത്ത് എയർ ടാക്സി സർവീസുകൾ, ഡെലിവറി ഡ്രോണുകൾ, പുതിയ തലമുറയിൽപ്പെട്ട ഇലക്ട്രിക് വ്യോമ വാഹനങ്ങൾ എന്നിവ സുരക്ഷിതമായി പൊതുരംഗത്ത് ഇറക്കുന്നതിന് മുന്നോടിയായാണ് റേഡിയോ ഫ്രീക്വൻസികൾ അനുവദിക്കുന്നതിനുള്ള ചട്ടങ്ങൾ അതോറിറ്റി പുതുക്കിയത്. അത്യാധുനിക സാങ്കേതികവിദ്യകൾ പൂർണ്ണ സുരക്ഷയോടെയും വിശ്വാസ്യതയോടെയും പ്രാവർത്തികമാക്കാനും വ്യോമ സുരക്ഷ ഉറപ്പാക്കാനും ഈ പുതിയ സംയോജിത നിയന്ത്രണ അന്തരീക്ഷം സഹായിക്കുമെന്ന് ടിഡിആർഎ വ്യക്തമാക്കി. ഇതിലൂടെ ആധുനിക സാങ്കേതികവിദ്യയുടെയും നൂതന കണ്ടുപിടുത്തങ്ങളുടെയും ആഗോള കേന്ദ്രമെന്ന യുഎഇയുടെ പദവി കൂടുതൽ ശക്തമാകുമെന്നും അധികൃതർ കൂട്ടിച്ചേർത്തു.