ദുബായ് എയർപോർട്ടിൽ പുതിയ മൊബൈൽ ഇമിഗ്രേഷൻ സേവനം

ദുബായ്: ദുബായ് വിമാനത്താവളങ്ങൾ വഴി യാത്ര ചെയ്യുന്നവർക്ക് പരമ്പരാഗത പാസ്‌പോർട്ട് കൗണ്ടറുകളിൽ നിൽക്കാതെ അതിവേഗം ഇമിഗ്രേഷൻ നടപടികൾ പൂർത്തിയാക്കാൻ പുതിയ സംവിധാനം. ഇമിഗ്രേഷൻ ഉദ്യോഗസ്ഥർക്ക് കൈയ്യിൽ കരുതുന്ന സ്മാർട്ട് മൊബൈൽ ഉപകരണങ്ങൾ ഉപയോഗിച്ച് യാത്രക്കാരുടെ വിവരങ്ങൾ പരിശോധിക്കാനും clearance നൽകാനും സഹായിക്കുന്ന ‘ക്ലിക്ക് ആൻഡ് ട്രാവൽ’ (Click and Travel) സേവനത്തിന് ഔദ്യോഗികമായി തുടക്കമായി. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സാണ് (GDRFA) ഈ പദ്ധതി നടപ്പിലാക്കിയത്.
ഫേഷ്യൽ റെക്കഗ്നിഷൻ, ബയോമെട്രിക് സാങ്കേതികവിദ്യ, ഇലക്ട്രോണിക് പാസ്‌പോർട്ട് റീഡിംഗ് എന്നിവ ഉപയോഗിച്ച് കേവലം 12 മുതൽ 15 സെക്കൻഡുകൾക്കുള്ളിൽ ഒരാളുടെ യാത്രാ നടപടികൾ പൂർത്തിയാക്കാൻ ഈ സംവിധാനത്തിലൂടെ സാധിക്കും. യുഎഇ പൗരന്മാർ, റസിഡന്റുകൾ, ജിസിസി പൗരന്മാർ, സന്ദർശകർ എന്നിവർക്ക് ആഗമന, നിർഗ്ഗമന (Arrival & Departure) ടെർമിനലുകളിൽ ഈ സേവനം ലഭ്യമാണ്. കുട്ടികൾക്കും ഭിന്നശേഷിക്കാർക്കും (People of Determination) ക്യൂവിൽ നിൽക്കാതെ തന്നെ ഉദ്യോഗസ്ഥർ അടുത്തേക്ക് എത്തി യാത്രാ നടപടികൾ പൂർത്തിയാക്കി നൽകുമെന്നത് പദ്ധതിയുടെ പ്രത്യേകതയാണ്.