14
അബുദാബി : വാഹനമോടിക്കുന്നതിനിടയിലെ അശ്രദ്ധ കാരണം നിയന്ത്രണം വിട്ട് കാറുകൾ മറിയുന്നതും കൂട്ടയിടിയുണ്ടാകുന്നതുമായ ഭീതിജനകമായ ദൃശ്യങ്ങൾ അബുദാബി പൊലീസ് പുറത്തുവിട്ടു. ട്രാഫിക് ബ്ലോക്കിൽ മറ്റ് വാഹനങ്ങൾ വേഗത കുറയ്ക്കുമ്പോൾ തൊട്ടുപിന്നാലെ വരുന്ന വാഹനങ്ങൾ മതിയായ അകലം പാലിക്കാതെ വന്നിടിക്കുന്നതാണ് ദൃശ്യങ്ങളിലുള്ളത്. ഡ്രൈവിങ്ങിനിടയിൽ മൊബൈൽ ഫോൺ ഉപയോഗിക്കുന്നതും സോഷ്യൽ മീഡിയ പരിശോധിക്കുന്നതുമാണ് ഇത്തരം വലിയ അപകടങ്ങൾക്ക് പ്രധാന കാരണമെന്ന് പൊലീസ് മുന്നറിയിപ്പ് നൽകി.
വാഹനമോടിക്കുമ്പോൾ ഫോൺ ഉപയോഗിക്കുകയോ മറ്റ് കാര്യങ്ങളിൽ ശ്രദ്ധ തിരിക്കുകയോ ചെയ്യുന്നത് ഗുരുതരമായ സുരക്ഷാ ഭീഷണിയാണ് ഉയർത്തുന്നത്. അശ്രദ്ധമായി വാഹനമോടിക്കുന്ന നിയമലംഘകർക്ക് 800 ദിർഹം പിഴയും ലൈസൻസിൽ 4 ബ്ലാക്ക് പോയിന്റുകളും ശിക്ഷയായി ലഭിക്കുമെന്നും അബുദാബി ട്രാഫിക് അധികൃതർ വ്യക്തമാക്കുന്നു.