ദുബായ് : പ്രമുഖ നിക്ഷേപക കമ്പനിയായ ഷമാൽ ഹോൾഡിംഗുമായി സഹകരിച്ച് ദുബായ് ഹാർബറിലേക്കുള്ള പ്രധാന പാലം വികസന പദ്ധതിയുടെ 90 ശതമാനം ജോലികളും റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) പൂർത്തിയാക്കി. ഇരുവശങ്ങളിലേക്കുമായി രണ്ട് ലെയ്നുകളുള്ള 1500 മീറ്റർ നീളമുള്ള ഈ പാലം യാഥാർത്ഥ്യമാകുന്നതോടെ ഷെയ്ഖ് സായിദ് റോഡിൽ നിന്നും ദുബായ് ഹാർബറിലേക്ക് നേരിട്ട് പ്രവേശിക്കാൻ സാധിക്കും.
മിഡിൽ ഈസ്റ്റിലെ ഏറ്റവും വലിയ യാർഡ് മറീനയുള്ള ദുബായ് ഹാർബറിലേക്കുള്ള യാത്രാസമയം ഇതോടെ 12 മിനിറ്റിൽ നിന്നും വെറും 3 മിനിറ്റായി കുറയും.മണിക്കൂറിൽ 6,000 വാഹനങ്ങളെ ഉൾക്കൊള്ളാൻ ശേഷിയുള്ള ഈ പാലം ഷെയ്ഖ് സായിദ് റോഡിലെ ഇന്റർചേഞ്ച് 5-ൽ നിന്ന് ആരംഭിച്ച് അൽ നസീം സ്ട്രീറ്റ്, അൽ ഫലക് സ്ട്രീറ്റ് എന്നിവ കടന്ന് കിംഗ് സൽമാൻ ബിൻ അബ്ദുൽ അസീസ് അൽ സൗദ് സ്ട്രീറ്റ് വഴി ദുബായ് ഹാർബർ റോഡിലേക്കാണ് നീളുന്നത്. 1400-ലധികം എൻജിനീയർമാരും തൊഴിലാളികളും അടങ്ങുന്ന 12 ടീമുകളാണ് പദ്ധതിക്കായി ഒരേസമയം പ്രവർത്തിക്കുന്നത്. പദ്ധതിയുടെ സമയക്രമം അനുസരിച്ച് ഷെയ്ഖ് സായിദ് റോഡിൽ നിന്നും ദുബായ് ഹാർബറിലേക്കുള്ള ഗതാഗതം ഈ ജൂൺ മാസത്തിൽ തുറന്നുകൊടുക്കും. ജൂലൈ മാസത്തോടെ ദുബായ് ഹാർബറിൽ നിന്നും അൽ നസീം സ്ട്രീറ്റിലേക്കുള്ള ഗതാഗതവും പൂർണ്ണമായി തുറക്കുമെന്ന് ആർടിഎ ഡയറക്ടർ ജനറൽ മത്തർ അൽ തായർ വ്യക്തമാക്കി. പദ്ധതി പൂർത്തിയാകുന്നതോടെ മേഖലയിലെ ഗതാഗതക്കുരുക്കിന് വലിയ പരിഹാരമാകും.
