അബുദാബി : യുഎഇ പൗരന്മാർക്ക് ലെബനനിലേക്ക് യാത്ര ചെയ്യുന്നതിനുള്ള വിലക്ക് നീക്കിയതായി വിദേശകാര്യ മന്ത്രാലയം (MoFA) അറിയിച്ചു. 2026 ജൂൺ 29 മുതൽ പുതിയ തീരുമാനം പ്രാബല്യത്തിൽ വന്നു. യാത്രയ്ക്ക് മുൻപായി മന്ത്രാലയത്തിന്റെ ‘ത്വവാജുദി’ (Twajudi) സേവനത്തിൽ നിർബന്ധമായും രജിസ്റ്റർ ചെയ്യണമെന്ന് അധികൃതർ വ്യക്തമാക്കി. രജിസ്ട്രേഷൻ പൂർത്തിയാക്കാത്ത സ്വദേശികളെ വിമാനത്താവളങ്ങൾ വഴി യാത്ര ചെയ്യാൻ അനുവദിക്കില്ല. അടിയന്തര ഘട്ടങ്ങളിൽ സഹായത്തിനായി സ്വദേശികൾക്ക് +971 80024 എന്ന ഹോട്ട്ലൈൻ നമ്പറിൽ ബന്ധപ്പെടാം.
ദുബായ് : ആഗോള വിപണിയിലെ ചലനങ്ങൾക്ക് പിന്നാലെ യുഎഇയിലും സ്വർണ്ണവിലയിൽ വലിയ ഇടിവ് രേഖപ്പെടുത്തി. ചൊവ്വാഴ്ച വിപണി ആരംഭിച്ചപ്പോൾ 24 കാരറ്റ് സ്വർണ്ണത്തിന് ഗ്രാമിന് 480.25 ദിർഹമായാണ് വില കുറഞ്ഞത്; മുൻദിവസം ഇത് 485.75 ദിർഹമായിരുന്നു. മറ്റ് നിരക്കുകളായ 22 കാരറ്റിന് 444.75 ദിർഹവും, 21 കാരറ്റിന് 426.50 ദിർഹവും, 18 കാരറ്റിന് 365.50 ദിർഹവുമായാണ് വില താഴ്ന്നത്. ആഗോള വിപണിയിൽ സ്പോട്ട് ഗോൾഡ് വില ഔൺസിന് 4,000 ഡോളറിന് താഴേക്ക് പതിച്ച് 3,987 ഡോളറിലെത്തി. 2008 ഒക്ടോബറിന് ശേഷമുള്ള ഏറ്റവും വലിയ പ്രതിമാസ ഇടിവാണ് ഇപ്പോൾ സ്വർണ്ണവിലയിൽ ദൃശ്യമാകുന്നത്. എന്നാൽ ഇത് വിപണിയിലെ താൽക്കാലികമായ ഒരു തിരുത്തൽ (Consolidation) മാത്രമാണെന്നും കേന്ദ്ര ബാങ്കുകളുടെ സ്വർണ്ണശേഖരണവും ഭൗമരാഷ്ട്രീയ സാഹചര്യങ്ങളും കാരണം ദീർഘകാലാടിസ്ഥാനത്തിൽ സ്വർണ്ണവില അനുകൂലമായി തുടരുമെന്നുമാണ് സാമ്പത്തിക വിദഗ്ദ്ധരുടെ വിലയിരുത്തൽ.
ദുബായ് : തുടർച്ചയായ നാല് മാസത്തെ വർദ്ധനവിന് ശേഷം യുഎഇയിലെ ജൂലൈ മാസത്തെ ഇന്ധനവില പ്രഖ്യാപിച്ചു. പുതിയ നിരക്കുകൾ പ്രകാരം പെട്രോൾ, ഡീസൽ വിലകളിൽ വലിയ കുറവാണ് രേഖപ്പെടുത്തിയിരിക്കുന്നത്. 2026 ജൂലൈ 1 മുതൽ പ്രാബല്യത്തിൽ വരുന്ന പുതിയ നിരക്കുകൾ പ്രകാരം സൂപ്പർ 98 പെട്രോളിന് ലിറ്ററിന് 3.40 ദിർഹമായിരിക്കും വില, ജൂണിൽ ഇത് 3.95 ദിർഹമായിരുന്നു. സ്പെഷ്യൽ 95 പെട്രോളിന്റെ വില ജൂണിലെ 3.83 ദിർഹത്തിൽ നിന്ന് 3.29 ദിർഹമായി കുറഞ്ഞു. ഇ-പ്ലസ് 91 പെട്രോളിന് ലിറ്ററിന് 3.21 ദിർഹമായിരിക്കും പുതിയ നിരക്ക്, മുൻമാസം ഇത് 3.76 ദിർഹമായിരുന്നു. ഡീസൽ വിലയിലാകട്ടെ വൻ ഇടിവാണ് രേഖപ്പെടുത്തിയത്, ജൂണിലെ 4.33 ദിർഹത്തിൽ നിന്ന് ലിറ്ററിന് 3.60 ദിർഹമായാണ് ഡീസൽ വില കുറഞ്ഞിരിക്കുന്നത്.
ഫെബ്രുവരിക്ക് ശേഷം ഗൾഫ് മേഖലയിലുണ്ടായ പ്രത്യേക സാഹചര്യങ്ങൾ കാരണം യുഎഇയിൽ ഇന്ധനവില 60 ശതമാനത്തിലധികം വർദ്ധിച്ചിരുന്നു. എന്നാൽ ജൂൺ മാസത്തിൽ ആഗോള വിപണിയിൽ അസംസ്കൃത എണ്ണവില വലിയ തോതിൽ ഇടിഞ്ഞതാണ് ഇപ്പോൾ സാധാരണക്കാർക്ക് ആശ്വാസമായി വില കുറയാൻ കാരണമായത്. ഒപെക് കൂട്ടായ്മയിൽ നിന്ന് യുഎഇ മാറിയതും വരും നാളുകളിൽ എണ്ണ ഉത്പാദനം വർദ്ധിപ്പിക്കാൻ സഹായിക്കുമെന്നാണ് വിലയിരുത്തൽ. ജൂലൈയിലെ ഈ വിലക്കുറവ് യുഎഇയിലെ പ്രവാസികൾ ഉൾപ്പെടെയുള്ള കുടുംബങ്ങളുടെ പ്രതിമാസ ബഡ്ജറ്റിൽ വലിയ ആശ്വാസം നൽകും.
ദുബായ് : അന്താരാഷ്ട്ര ആസ്റ്ററോയിഡ് ദിനമായ ജൂൺ 30-ന് യുഎഇ ആകാശത്ത് അപൂർവ്വ ഇരട്ട വിസ്മയമായി ‘സ്ട്രോബെറി മൈക്രോമൂൺ’ ദൃശ്യമാകും. ഭൂമിയിൽ നിന്ന് ഏറ്റവും അകലെയുള്ള ഭ്രമണപഥത്തിൽ ചന്ദ്രൻ എത്തുന്നതിനാൽ സാധാരണ പൗർണ്ണമിയേക്കാൾ അല്പം ചെറുതായാണ് നാളെ ചന്ദ്രൻ കാണപ്പെടുക. നോർത്ത് അമേരിക്കൻ ഗോത്രവർഗ്ഗക്കാരുടെ സ്ട്രോബെറി വിളവെടുപ്പ് കാലത്തെ അടിസ്ഥാനമാക്കിയാണ് ജൂണിലെ പൂർണ്ണചന്ദ്രന് ഈ പേര് നൽകിയിരിക്കുന്നത്.
ഇതോടനുബന്ധിച്ച് ദുബായ് അസ്ട്രോണമി ഗ്രൂപ്പിന്റെ (DAG) നേതൃത്വത്തിൽ ദുബായ് സസ്റ്റൈനബിൾ സിറ്റിയിലെ ‘സീ ഇൻസ്റ്റിറ്റ്യൂട്ടിൽ’ വൈകുന്നേരം 7 മുതൽ രാത്രി 10 വരെ പ്രത്യേക നിരീക്ഷണ ക്യാമ്പും ഉൽക്കാശിലകളുടെ പ്രദർശനവും ഒരുക്കിയിട്ടുണ്ട്.
