വ്യാജ സ്ക്രീൻഷോട്ടുകൾ കാണിച്ച് ഇനി പണി കൊടുക്കാൻ നോക്കേണ്ട! യുഎഇ കോടതിയുടെ ചരിത്രപരമായ വിധി

അബുദാബി : സോഷ്യൽ മീഡിയ വഴി അനാശാസ്യ പ്രവർത്തനങ്ങൾക്ക് പ്രേരിപ്പിച്ചെന്ന കേസിൽ പ്രമുഖ വ്യക്തിത്വത്തിന് ഏർപ്പെടുത്തിയ 2.5 ലക്ഷം ദിർഹം (2.50 lakh AED) പിഴ വിധി യുഎഇ ഫെഡറൽ അപ്പീൽ കോടതി റദ്ദാക്കി. പ്രതികൾക്കെതിരായ ആരോപണങ്ങൾ സാങ്കേതികമായി തെളിയിക്കാൻ വാദിഭാഗത്തിന് സാധിച്ചില്ലെന്ന് ചൂണ്ടിക്കാട്ടിയാണ് കോടതി ഇവരെ പൂർണ്ണമായും കുറ്റമുക്തരാക്കിയത്.

ഭർത്താവിന്റെ പരാതിയുടെ അടിസ്ഥാനത്തിൽ ഫെഡറൽ ഫസ്റ്റ് ഇൻസ്റ്റൻസ് കോടതിയാണ് സ്ത്രീക്കും മറ്റൊരാൾക്കും കാൽ ലക്ഷം ദിർഹം വീതം പിഴ വിധിച്ചിരുന്നത്. സ്നാപ്ചാറ്റ് വഴി അവിഹിത ബന്ധം പുലർത്തിയെന്ന ആരോപണത്തിൽ ഭർത്താവ് സമർപ്പിച്ച ഡിജിറ്റൽ തെളിവുകൾ (ചാറ്റുകൾ, റെക്കോർഡിംഗുകൾ) അടിസ്ഥാനമാക്കിയായിരുന്നു ആദ്യ വിധി. എന്നാൽ അപ്പീൽ ഘട്ടത്തിൽ, ആരോപിക്കപ്പെട്ട സ്നാപ്ചാറ്റ് അക്കൗണ്ട് പ്രതിയുടെ ഉടമസ്ഥതയിലുള്ളതാണെന്നോ, കേസ് നടക്കുമ്പോൾ ഉപകരണം അവരുടെ കൈവശമായിരുന്നു എന്നോ സാങ്കേതികമായി തെളിയിക്കാൻ ഡിജിറ്റൽ ഫോറൻസിക് പരിശോധനകൾക്ക് സാധിച്ചില്ലെന്ന് പ്രതിഭാഗം അഭിഭാഷകൻ അഹമ്മദ് അൽ സറൂണി ചൂണ്ടിക്കാട്ടി.

ഒരു അക്കൗണ്ടിൽ ഒരാളുടെ പേര് പ്രത്യക്ഷപ്പെട്ടു എന്നതുകൊണ്ടു മാത്രം അക്കൗണ്ടിന്റെ ഉടമസ്ഥാവകാശം തെളിയുന്നില്ലെന്ന് വ്യക്തമാക്കിയ കോടതി, സംശയത്തിന്റെ ആനുകൂല്യം നൽകി വിചാരണ കോടതി വിധി റദ്ദാക്കുകയായിരുന്നു. ഡിജിറ്റൽ തെളിവുകളുടെ വിശ്വാസ്യത ഉറപ്പാക്കുന്നതിൽ യുഎഇ കോടതികൾ പുലർത്തുന്ന കടുത്ത ജാഗ്രത വ്യക്തമാക്കുന്നതാണ് ഈ കേസ്.