ദുബായ് : കേസ് നടക്കുമ്പോൾ മുസ്ലീം ദമ്പതികൾ തമ്മിൽ കോടതിയിൽ വെച്ച് ഉണ്ടാക്കുന്ന ഒത്തുതീർപ്പ് വ്യവസ്ഥകൾ പിന്നീട് ഉയർന്ന കോടതികളിൽ ചോദ്യം ചെയ്യാനാവില്ലെന്ന് ദുബായ് കോർട്ട് ഓഫ് കസേഷൻ വിധി പ്രസ്താവിച്ചു. ഫസ്റ്റ് ഇൻസ്റ്റൻസ് കോടതിയിലോ അപ്പീൽ കോടതിയിലോ വെച്ച് ഇരുവിഭാഗവും എത്തിച്ചേരുന്ന ധാരണകൾ മിനിറ്റ്സിൽ രേഖപ്പെടുത്തി എക്സിക്യൂട്ടീവ് ഓർഡർ ആയി മാറിയാൽ, അത് അന്തിമവും നിർബന്ധമായും നടപ്പിലാക്കേണ്ടതുമാണെന്ന് കോടതി വ്യക്തമാക്കി.
ഭർത്താവ് നൽകിയ വിവാഹമോചന കേസിൽ 1,25,000 ദിർഹത്തിന് ഭാര്യയുമായി ഒത്തുതീർപ്പിലെത്തിയ ശേഷം, തനിക്ക് ഭാഷ മനസ്സിലായില്ലെന്ന കാരണം പറഞ്ഞ് ഭർത്താവ് സമർപ്പിച്ച അപ്പീൽ തള്ളിക്കൊണ്ടാണ് ദുബായ് ഉയർന്ന കോടതി നിർണ്ണായക നിലപാട് വ്യക്തമാക്കിയത്. ഔദ്യോഗിക മിനിറ്റ്സിന്റെ ഭാഗമാകുന്ന ഇത്തരത്തിലുള്ള കരാറുകൾ ഒരു ജുഡീഷ്യൽ വിധി അല്ലാത്തതിനാൽ അതിനെതിരെ അപ്പീൽ ഹർജിയോ കസേഷൻ ഹർജിയോ സമർപ്പിക്കാൻ കഴിയില്ലെന്ന് കോടതി ചൂണ്ടിക്കാട്ടി.
3