ദുബായ് : ബാങ്ക് കാർഡുകൾ, ക്ലൗഡ് അക്കൗണ്ടുകൾ, ഫുഡ് ഡെലിവറി ആപ്പുകൾ, വയർലെസ് ഹെഡ്‌ഫോണുകൾ, ട്രാക്കിംഗ് ഡിവൈസുകൾ എന്നിവയിലൂടെ ലഭിക്കുന്ന ഡിജിറ്റൽ വിവരങ്ങൾ യുഎഇയിലെ കുടുംബ തർക്കങ്ങളിലും വിവാഹമോചന കേസുകളിലും നിർണ്ണായക തെളിവുകളായി മാറുന്നു. സ്നേഹത്തിലും വിശ്വാസത്തിലും പങ്കുവെക്കുന്ന ലൊക്കേഷൻ വിവരങ്ങളും, ചെലവഴിക്കുന്ന പണത്തിന്റെ കണക്കുകളും പിന്നീട് തെറ്റിദ്ധാരണകളോ തർക്കങ്ങളോ ഉണ്ടാകുമ്പോൾ പങ്കാളിക്കെതിരെയുള്ള തെളിവുകളായി ഉപയോഗിക്കപ്പെടുകയാണ്.
ജീവനാംശം (Alimony) നൽകാൻ സാമ്പത്തിക ശേഷിയില്ലെന്ന് കോടതിയിൽ വാദിച്ച ഭർത്താവിന്റെ മൊബൈൽ ഗെയിമിംഗ് ആപ്പുകളിലെയും ഫുഡ് ആപ്പുകളിലെയും വൻ തുകയുടെ ഇടപാടുകൾ തെളിവായി ഉയർന്നുവന്ന കേസ് ഇതിനൊരു ഉദാഹരണമാണ്. പങ്കാളിയുടെ അറിവോടെയും സമ്മതത്തോടെയും നൽകുന്ന ഡിജിറ്റൽ ആക്‌സസുകളും (Digital access) രഹസ്യമായി ചോർത്തുന്ന വിവരങ്ങളും നിയമപരമായി വ്യത്യസ്ത രീതിയിലാണ് കോടതി കണക്കിലെടുക്കുന്നതെന്ന് പ്രമുഖ ലീഗൽ കൺസൾട്ടന്റുമാർ വ്യക്തമാക്കുന്നു. പാസ്‌വേഡുകളും ആപ്പുകളും പങ്കുവെക്കുന്നത് പരസ്പര വിശ്വാസത്തിന്റെ ഭാഗമാണെങ്കിലും, അത് പങ്കാളിയെ എപ്പോഴും നിരീക്ഷിക്കാനുള്ള (Surveillance) അനുവാദമല്ലെന്നും, ഡിജിറ്റൽ അക്കൗണ്ടുകൾ ഉപയോഗിക്കുമ്പോൾ വ്യക്തമായ അതിർവരമ്പുകൾ പാലിക്കണമെന്നും സാമൂഹിക സാമ്പത്തിക വിദഗ്ദ്ധർ ഓർമ്മിപ്പിക്കുന്നു.
13