ന്യൂഡൽഹി : ഇന്ത്യ സന്ദർശനം പൂർത്തിയാക്കി മടങ്ങുന്നതിനിടെ തന്നെ അനുഗമിച്ച ഡ്രൈവർക്ക് സ്നേഹപൂർവ്വം ആലിംഗനം ചെയ്ത് നന്ദിയറിയിച്ച് അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ. വിമാനത്തിലേക്ക് കയറാൻ ഒരുങ്ങുന്നതിനിടെ തിരികെ നടന്നെത്തി ഡ്രൈവർക്ക് ആലിംഗനം നൽകി നന്ദി പറഞ്ഞ അദ്ദേഹത്തിന്റെ ഈ പ്രവൃത്തി സോഷ്യൽ മീഡിയയിൽ വൻതോതിൽ തരംഗമായിരിക്കുകയാണ്.
സ്ഥാനമാനങ്ങൾക്കപ്പുറം മനുഷ്യരെ ബഹുമാനിക്കുന്ന യുഎഇയുടെ രാഷ്ട്രപിതാവ് അന്തരിച്ച ഷെയ്ഖ് സായിദ് ബിൻ സുൽത്താൻ അൽ നഹ്യാന്റെ മൂല്യങ്ങളുടെ പ്രതിഫലനമാണ് ഈ പ്രവൃത്തിയെന്ന് സമൂഹമാധ്യമങ്ങളിൽ നിരവധി പേർ അഭിപ്രായപ്പെട്ടു.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന് പകരം ന്യൂഡൽഹിയിൽ നടന്ന ബ്രിക്സ് ഉച്ചകോടിയിൽ പങ്കെടുക്കാനാണ് ഷെയ്ഖ് ഖാലിദ് ഇന്ത്യയിലെത്തിയത്. സന്ദർശനവേളയിൽ ഇന്ത്യൻ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയ അദ്ദേഹം മറ്റ് പ്രമുഖ ലോക നേതാക്കളുമായും ചർച്ചകൾ നടത്തിയിരുന്നു. ഉന്നതതല നയതന്ത്ര ചർച്ചകൾക്കും ഔദ്യോഗിക തിരക്കുകൾക്കും ശേഷവും അദ്ദേഹം കാണിച്ച ഈ ലളിതവും സ്നേഹനിർഭരവുമായ പെരുമാറ്റമാണ് ഇപ്പോൾ ഏവരുടെയും മനം കവരുന്നത്.