അബുദാബി : 2026-ന്റെ ആദ്യ പകുതിയിൽ വടക്കൻ എമിറേറ്റുകളിലായി 73,624 അടിയന്തര കേസുകളിൽ നാഷണൽ ആംബുലൻസ് സേവനം ലഭ്യമാക്കിയതായി അധികൃതർ അറിയിച്ചു. ഷാർജ, അജ്മാൻ, റാസൽഖൈമ, ഫുജൈറ, ഉമ്മുൽഖുവൈൻ എന്നീ എമിറേറ്റുകളിലായി 58,781 രോഗികൾക്കാണ് വിദഗ്ധ പരിചരണം നൽകിയത്. നാഷണൽ ആംബുലൻസിന്റെ അബുദാബിയിലെ പുതിയ ആസ്ഥാനം ആരോഗ്യ-പ്രതിരോധ മന്ത്രി അഹമ്മദ് ബിൻ അലി അൽ സയീഗ് ഉദ്ഘാടനം ചെയ്തു. ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉൾപ്പെടുത്തിയ അത്യാധുനിക കമ്മ്യൂണിക്കേഷൻ സെന്ററും പുതിയ ആസ്ഥാനത്തുണ്ട്. 998 എന്ന നമ്പറിലൂടെ പൊലീസും സിവിൽ ഡിഫൻസുമായി ചേർന്നാണ് ഇവരുടെ 24 മണിക്കൂർ രക്ഷാപ്രവർത്തനം.
